Bitar ka seng Hindu, ba phah rah Baibl sha skul

Bengalure: Ka Clarence High School ha Karnataka, ka la pan ia ka jing mynjur jong ki kmie ki kpa jong ki khynnah skul, ba kim dei ban pyrshah ia ki khun jongki, ba kin rah ia ka Bible, haba ki leit sha skul. Katei ka jingbthah, ka la pynbitar jur, ia ki kynhun niam hindu, da kaba ong, ba katei ka long pyrshah ia ka ain jong ka Karnataka, lane ka Karnataka Education Act.

U nongkren ka Hindu Janajagruti Samithi, U Mohan Gowda, u kam ba katei ka skul, ka pynbor ia ki samla pule, ki bym dei ki kristan, ba kin pule Bible. Na ka liang jong ka skul, ka kyntait ia katei ka jingkynnoh, hynrei, ka ong ba ka ai jinghikai ia ki mat kiba don jingiadei bad ka Bible.

Ha ka jing rung klass, na bynta ki Class 11, ka la thoh shai, ba ki kmie ki kpa, kin shah ia ki khun jongki, ba kin leit sha ka klas kaba mynstep, lane kaba don ka klass ban pule ia ki kot bakhuid, kaba dei na ka bynta ka jinghikai ba kynja mynsiem jongki bad ba kim dei ban khanglad ban rah ia ka Bible bad ia ka kot jingrwai, haba leit sha katei ka skul.

Dangshen ka sorkar jylla, ka la pynbna ba kan hikai ia ka kot Bhagavad Gita ha ki skul, ha kaba u myntri rangbah ka jylla, u kren shai ba katei ka rai, ka dang iaid ha ka jingiakren, ba kan dei kawei na ki lynnong pule ha ki skul.