Yn sdang tan ding na ka Mawphu Projek, ong u heh ka NEEPCO

Shillong, 27 Naitung:
U Chairman ka NEEPCO u PC Pankaj u la pynthikna ba ka Mawphu Power Projek ka la don ha ka lynti ban dep noh ban pynkhreh ia ka detailed project report (DPR) bad shen yn sdang noh ia ka kam.
Haba kren sha ki nongthoh khubor mynta ka sngi,  u chairman ka NEEPCO u PC Pankaj u la ong ba mynta ka DPR la phah sha ka sorkar pdeng ba kan ai noh ia ka jingmynjur. “Mar ia ioh ia ka jingmynjur na ka sorkar pdeng, ngin sdang noh ia ka jingtei ia ka projek” u la ong. U la ong ba kam don satia kano kano ka jing pyrshah ia kane ka projek na ri Bangladesh.
Lah ban kdew ba ha u 2012, u myntri bording ka ri u M Veerappa Moily u la buh ia u maw nongrim ia kane ka projek kaba 85 MW kaba ai kyrteng ka Mawphu hydel power project bad ka jaka sah ki nongtrei ka NEEPCO.
Ia kane ka projek la mang T.453.81 klur bad la buh thong ban pyndep hapoh saw snem shiteng naduh ba la sdang ia ka kam. Kane ka dei ka projek ba nyngkong ha kane ka jylla ban pyntreikam da ka  NEEPCO.