Ka jingleh buhrieh ia ki skhim sorkar

Ki jing pyrshah ki la nang jur, ha kine ki sngi, ia ki skhim sorkar bapher bad ka daw, ka long ba ki paidbah, kim bna satia ia ka bneng, ka khyndew; namar ba ki tnat sorkar, ki shu leh sop sop, ia ki kam bapher jongki.

Khyndiat bnai mynshwa, ka don ka jingthmu ban shim ia ka projek bording ha wah Umngot bad ki la ia mih ki paidbah ban khang syndon; mynta ka iaid ka jing pynkhreh ban pyntrei ia ki smart meter bad katei ruh ka mih ka jingpyrshah kaba bun bad nangta, sa ka jingshah kynnoh bamsap jong katei ka tnat.
Kam kut tang katta, ka iaid sa ka jing pynkhreh ban ia pynbeit pud bad ka Assam bad katei ruh ka mih mawjynthut bad nangta, sa ka jaka bret niut bad katei ruh, ka mih mawjynthut bad nangta sa ka ktien hindi ruh ka mih maw jynthut bad kane ka pyni, ba ka don ka jingdkoh kaba jur, halor ka rukom treikam ki tnat sorkar.

Ka ju long ka rukom, ba ka sorkar ka ju pynbna iar ia ki jingthmu jongka, sha ki kotkhubor, ha shwa ba kin sdang ia ki projek, khamtam ia ki projek kiba heh bad nangta ka jingpynbna kam kut tang kaba pynbna, hynrei, ka jing pynshai sha ki paidbah, ka long kaba donkam shi katdei; katba ka sorkar jylla, kam ju pyntrei kam satia ia kata kaba ka sorkar India, ka la mang lypa, ha kano kano ka thup jong ka projek sorkar.
Peit nuksa ia u smar meter, ki ia sngap man man bad kane ka pynlong ia ki riew paidbah, ba kin ia batai katba lap, katba shem bad kane ka pynjlep noh ia uba bun balang, ia kum kitei ki projek; nangta ia ka ishu kam pud, la dei ban iashai bha ha dorbar jylla, ha District Council bad ka dei ban long ka dulir paidbah, kaba lah ban ia peit bniah (namar ka ktah ia ka nongkynti jong u shimet), hynrei katei ruh, kam shai haduh ha kine ki sngi bad ki sa ioh, kiba kham nang, ban tylliat musli musla ban pynblad ia katei ka jyntah bang jong ka sorkar.

Kane ka jingleh buhrieh, kam dei tang ia kitei ki projek haneng, hynrei, ka dei ia ki kam pynroi sha ki nongkyndong, ia ka rep ka riang, ia ki lad jingiarap ia ki samla khlem kam khlem jam bad kiba bun bah ki kam bapher, ba la shu set beit sbak, ha ki saw kynroh jong ki ophis sorkar; kiba plie lad ia ka jing ia pyni por, ki riew paidbah bad ka sorkar jylla.