Ka hindi shakhmat, ka khasi shadien

Hadien khyndiat sngi, ba U Amit Shah myntri ka sorkar India, u la iathuh khyllew, ba ki jylla, ka thain shatei lam mihngi, ki la ia mynjur ban ia pule hindi noh haduh Class X, ki la don shibun, kiba ia kyrshan bad ki don ruh sa shibun pat kiba pyrshah; hynrei, lada iakren ha khmat u paidlang ka India, ka pyni shai ba ka jylla, ka la mynjur ia ka thoh bad pule hindi, namar ba u myntri rangbah bad u symbud myntri rangbah, ki la dep mynjur, ban iahap jingmut bad U Amit Shah.

Ban iakren, ka mat ka jylliew bha, hynrei ka don ka rukom pyrkhat, ha kine ki sngi, ha ka jabieng jong kiba bun ki riew sain pyrthei bad kata ka long, ba lada lah ban kyllan khohwah ia ki heh nongialam sha Delhi, kumta kan tuid shibun ka malai dud, hynrei, lada ym lah ban leh kumta, lah ban ioh, tang da ka doi suda.
Ka Meghalaya, haduh mynta, kam don kamai eiei ruh nalade, lait tang na ka petrol bad ka kyiad; hynrei ia ki lad kamai jongka, la knieh lut noh ka sorkar India, ha ka khajna GST bad ha kane ka jinglong jingman kaba mynta, ka jylla, ka hap ban shaniah na khlieh haduh ha kjat, ha ka jing synei ka sorkar India.

Haba ka sorkar India, ka pynbor ban ia pule hindi noh, ngi iohi, ba u myntri ka pule puthi, ka sorkar jylla; u sngap man man; hynrei ka mat, ka long ba haba baroh baroh, ki ia khohreh ban ia pule hindi noh, kumta ka jingmut ban nang pynkhlain ia ka pule Khasi, ka la jah noh sha kyndong, namar wat mynta, bym pat don ka jingshah pynbor, hynrei kiba bun ki samla pule, ki la bun kiba kyntait ban pule Khasi, khamtam, ynda ki la poi ha ki kyrdan kiba kham heh.
Ka Khasi, ka dei ka ktien, kaba ngi iakren ha ka Ri Khasi,kumba ka Assamese, ka dei ha Assam, nangta ka wan sa English bad hindi, ba ngi iakren paidbah; hynrei, lada ngi mih shabar ri, ngim lah ban long kiba bieit English, kaba dei ka ktien, kaba ia sngewthuh satlak pyrthei.

Khyndiat taiew mynshwa, ngim pat klet, ba kiba bun ki samla pule doktor, ki wan phai noh na Ukraine, na ka jingkhie ka thma bad kitei ki leit sha katei ka Ri, kam dei ba ki kwah kren Ukraine, hynrei, ki kwah kyrdan doktor; kumta lada jia ba ki leit pule doktor, da kaba thoh bad kren hindi sha Ukraine, hangta te la wai artad ka iew.