Na ka kyrdan 51 ha u snem 2018, sha ka kyrdan ba 5, kiew ka Ri Bhoi ha ka jingpyntrei ia ki skim pynroi, ong u Kiren Rijiju

Nongpoh: Haba iadei bad ka jingpyntrei ia ki kam pynroi kaba la pynmang kyrpang da ka sorkar kmie ha Ri Bhoi, kaba ka Distrik ka la ioh namar ba ka la shah pynkynthup ha ka Aspirational District, u Kiren Rijiju, Myntri ka sorkar pdeng bad uba deipeit ia ka Law and Justice, u la ong ba ka Ri Bhoi, ka la biang eh ha ka jingpyntrei kam ia ki skim pynroi kaba la pynmang da ka sorkar pdeng, namar na ka kyrdan kaba 51 kaba ka la bat ha u snem 2018, hynrei mynta pat ka la kiew syndon ha ka kyrdan ba 5, kata haba khein kyllum na ki 122 tylli ki Aspirational District kiba don hapoh ka ri.

Haba kren sha ki lad pathai khubor ha Nongpoh, u Kiren Rijiju, u la ai ka jingiaroh kaba khraw eh ia ki ophisar na ki tnat sorkar bapher bapher, namar ba ki la lah shisha ban pyntreikam bha ia ki skim pynroi, kaba ka sorkar pdeng ka la pynmamg kyrpang hapoh ki shnong kiba don hapoh ka Distrik. Wat haba ka Ri Bhoi ka la kiew haduh ka kyrdan ba 5 halor ka jingpyntreikam ia ki skim pynroi, hynrei u U Kiren Rijiju, u la kyntu ruh ia ki ophisar sorkar hapoh ka Distrik, ba ki dei ban nangtrei shitom shuh shuh, khnang ba ka Ri Bhoi kan kiew sha ka kyrdan kaba nyngkong bad ha kaba kum kata ka por, kan kyntiew ia ka roi ka par ym tang hapoh ka Distrik ne jylla, hynrei ha ka ri hi baroh kawei.

U Kiren Rijiju, u la ong ruh ba ki Aspiritional District, ka dei kawei na ki prokam kaba donkam eh ia kaba la peit la khmieh lyngba ka NITI Aayog, lyngba katei ka prokram ka long ban kyntiew ia ka India ba kan long kum kawei na ki Ri kaba kiew eh ha ka ioh ka kot ha ka pyrthei hi baroh kawei, namar kumba ka long mynta ka sorkar India, ka don ia ka thong ba kan long kum kawei na ki ri kaba kiew eh ha ka ioh ka kot.

Ha katei ka sngi kaba u Kiren Rijiju, u la wan sha Ri Bhoi, nyngkong u la pynlong ia ka jingialang bad baroh ki heh ophisar sorkar ha Conference Hall kaba don ha ophis DC, ha kaba la donlang naduh u Dr. Joram Beda IAS, Secretary Planning ka sorkar jylla, u Arpit Upadhyay, IAS, DC ka Ri Bhoi, u Giri Prasad, SP Ribhoi lem bad kiwei. Hadien kata pat u la leit ban jurip ia ki katto katne ki shnong ia ka jingpyntrei ia ki skim pynroi ha ki katto katne ki shnong ha Ri Bhoi.