Tangon eh dain dain hep, ai na shata dar

Ha ki kyntien u myllung Soso Tham, ula ong “tangon eh dain dain hep, ai na shata dar; tangon eh dain dain hep, kat dang saw u nar” bad kitei ki kyntien, ki iahap bha ha kane ka khep, ha ka por, ba ka Khasi Students Union (KSU) kum ka seng samla pule, lane kaba dang don ha ka kyrdan “hep” ka la rai ban bei pisa, ia kito ki samla kiba shlur, kiba mih ban iakhun ia ki eksamin UPSC sha Delhi.

Katei ka rai, ka la slem palat; hynrei kam pat dier por pat, ba ngin sngewthuh ba ia kane ka jylla, la pyniaid da ki heh spah bad ki riew khwan myntoi ialade ha ryngkat bad kito ki ophisar, kiba wan na kiwei pat ki jylla.

Ka dei ruh hangne kein, ba ngin peiphang, ba ki riewsain pyrthei, kim ju khmih lynti satia ia ka jingstad lane ka jingproh jabieng ki jaitbynriew lajong bad ia katei ngi hap ban pynshisha, lyngba ki kam, ba ki theh tyngka buk buk, ban tei surok, ban tei um, ban thaw iing thaw sem, hynrei kim kwah ba kin don ki skul kiba bha, ki jaka pule kiba bha, namar ba ki tip shai, ba lada ki samla trai shnong, kin kiew shajrong, kumta kine ki nong mihkhmat kiba bieit anna, kin nym ioh ban trei katba mon, namar ba kin shah peitsuh ha ki nongthep vote kiba stad.

Kane ka rai jong ka KSU, ka dei ka rai, kaba kum ka jaitbynriew, ngi dei ban ai jingiaroh bad ka dei ruh ia kito ki kmie ki kpa, kiba don ia ki khun, kiba proh jabieng, ba kin mih shakhmat ban noh synniang sha ka pla iarap jong ka KSU, ba kan pyniaid beit shakhmat ia katei ka kam bad kan bha shibun ruh ia ka KSU, ba kan buh da ka khajna, kaba biang bha na ki seng sain pyrthei lane na ki bar jylla, kiba kamai spah hangne, na ka bynta ban pyniaid shakhmat ia katei ka jingthmu ba donburom jongki bad ngi lah ruh ban ong, ba lada kane ka jingmut, kam mih na katei ka seng, kumta ngin nym khmih lynti shuh satia lano lano ruh, ba kan wan kawei pat ka jingmut na kano kano ka seng sain pyrthei lane na kano kano ka sorkar, namar ba ka jingmut jongki, ka long ban pyntrei kam hapoh san snem bad ka buit jop elekshon suda.

Ka KSU, ka la sngewthuh bha ruh, ba ka jingkhlain ka synshar khadar, kam dei satia ha ki MLA/MDC kiba jop, da ka tyngka; hynrei ka shong ha ki ophisar, kiba thaw ain, ia ki nongmihkhmat.