Ha Gethsemane U duwai,
Mynsiem ka pisa ka khuslai,
Ba ka por jong U ka la jan,
Jingshitom bad jingiap kan wan.
‘Ah ko Pa’ U duwai hangta,
Ai khuri kthang kan lait na nga,
Hynrei ym kum ka mon jong nga,
Ai kan long ka mon jong Me Pa.
Ki synran ki iohthiah lyngngai,
Kim lah ia ap lem bad U Trai,
Ynda ki la kyndit ki shem,
Nongshun i’U Trai ki wan ban kem.
La ialam ia U ban bishar,
Marwei U ieng ha khmat dorbar,
Sakhi sabut i’U Trai kim shem,
Hynrei ia U la rai pynrem.
Ia ka met Jong U la pynmong,
Pansngiat shiah ha khlieh la pynphong,
Ha met U bah diengphna ba khia,
I’U Trai jong ngi la sahnarphna.
Jingiap shyrkhei halor diengphna,
U shah namar jong phi jong nga,
Ba ngin lait na ka jingiap triem,
Um shym tyngkai ia la jingim.
Haba kynmaw ia ka diengphna,
Ki ummat kthang ki jaw na nga,
La dei ia nga keiñ ban shah iap,
Namar pop bad jingleh palat.
Ko lok baieit to tip mynta,
Phim shem shuh kum jingieit i Pa,
Ia l’U khun U phah sha pyrthei,
Nongpop kum ngi ban pynim ei.
Jingim jong ngi sha U ngin ai,
To ngin long jingthaw ba thymmai,
Kumba ma U U iap iapli,
Kyrteng jong U ngin long sakhi.
(La thoh da i bah Hopestarwell Snaitang na ka shnong Seiñduli II, West Khasi Hills District)
Nang kiew shaphrang Bah2 Snaitang