Jnang u doktor ka International Hospital ban jubab rHalor ka jingiap ka Victoria Kharkongor

Shillong, 23 Naitung:
Kawei na ki lad khubor ka TNT mynta ka sngi ka la ioh ban ia kren bad u Dr. Sushil Agarwal, Consultant Psychiatrist, International Hospital halor ka jingwan poi ka kong Victoria Kharkongor sha katei ka Hospital shuwa ban lap ia ka metiap jong ka ha thanad ki pulit ka Dispur Police Station. Ha katei ka jingiakren bad utei u doktor katei ka khubor, ka la kylli na u balei la phah ban wan shaw ki pulit ka kong Victoria na katei ka Hospital ha ka por ba ka la wan poi hangtei,U Dr.Agarwal u la jubab da kaba ong ba ka International Hospital kam don Psychiatric Ward bad dei na kata ka daw ym shym la pynrung ia ka hapoh katei ka hospital bad ym don nos ha katei ka hospital ban peit ia ki nongpang kum ia ka kong Victoria (namar ba la kynnoh ba ka don jingduna ha ka bor pyrkhat).
Haba la kylli biang balei ba haba ka don ia ka diary bad ia ka mobile phone ha kti , ba utei u doktor um shym la phone sha kiba ha iing hasem jong ka? Utei u doktor u la jubab ba u la pyrshang ban phone katto katne ki nombar hynrei ym don ba shim phone, kumta u la phone noh ia ki pulit ba kin leit buh ia ka sha Guahati Medical College Hospital (GMCH) kaba don ia ka jaka sumar.
La kylli biang balei ba ka International Hospital kam shym la phone sha ka GHCH , hynrei ka la phone pynban sha ki pulit ban wan shaw ia ka kong Victoria ka bym shym la don dak sniew ne kam shym la leh ki kam runar, “Kumno ngan tip ba kam leh kam sniew?” jubab biang utei u doktor, bad u la iathuh ruh ba ka rukom leh ka kong Victoria ha ka por ba ka wan poi sha katei ka Hospital, da kaba peit da ka khmat briew u la ong ba ka dei kaba don jingduna bad kam don shuh ha ka bor pyrkhat kaba biang.
U Dr.Agarwal u la jubab biang halor katei ka juh ka jingkylli da kaba u ong ba ka GMCH kam ju pynrung ia ki nongpang hapoh Hospital lymda don nongwan buh ia ki nongpang, la kylli biang na utei u doktor kaei ka ban jia pat ia kito ki nongpang ki bym don ba ha iing hasem? , utei u doktor um shym la lait ang, iathuh katei ka lad khubor hynrei u la kren kyllain kumne kumtai ban iada ialade bad um shym la lah ruh ban jubab shai ia ki jubab ba la kylli ia u balei u la phah ban wan shimti da ki pulit ia ka Victoria na katei ak Hospital.