Ka jingpynsaphriang, ia kane ka video, ka dei ka jingthad rong bad ka jingleh kaba ym lah ban pdiang

U Jisu u la khmied bad u la kylli ia ka, “Ko Kong, hangno ki їadon? Ym don mano mano ruh ba rai pynrem ia phi? Lada don kano kano ka daw kaba kongsan ba u Jisu u shah pynїap halor ka diengphna ka dei namar ba u їeng ban їada ia ka kynthei Nongsamria bad kiwei de ha ka juk bad ka por ba ka imlang sahlang Jiw ka kheiῆ poh dor ia ki kynthei.

Ha ki spah snem kiba la leit noh bad haduh mynta ki la mih ki jingїakhih paidbah ban їada bad pynїoh ki hok pura ha ki kynthei naduh ka lad ban shong skul, ban treikam trei jam bad ban їashim bynta ha ka synshar khadar. Ha kane ka pateng, kaba kham jur bad kaba jia khah khah man la ka por ka long ka jingїakhun ban їada ia ka longrynїeng man rynїeng jong ki na ka jingshah sloit, shah thombor bad shah leh be-ijot. Ki kynthei ki im ha ka jingtieng bad jingsyier, ki sheptieng ia ka jingdum namar la hikai ba ka miet kam dei ka jong ki. Ki sheptieng ban leit trei leit ktah ne leit bylla їoh ba ki shah leh tohmet bad shah sloit ka longrynїeng. Ki sheptieng ban kren bad ban їashim bynta ha ki kam ha ka imlang sahlang їoh ba ki shah kynthoh khlem akor bad khlem nongrim bad kiba bun kiwei de ki rukom ba ka imlang sahlang ka pyntieng koh tympan ia ki kynthei.

Dang shen ruh ha kine ki phra ne khyndai sngi kiba la leit noh la pynsaphriang ia kawei ka live chat video jong kawei ka samla Khasi na ka Jylla kaba la їathuh ba ka shong ka sah mynta ha Bangalore. Їa ka live chat video jong kane ka samla, kaba lah ban ong ba kiba їohi kin dei tang ki nongbud ne ki paralok jong ka, hynrei mynta la pynsaphriang ha ki rynsan social media bapher bapher bad ki la mih ki jingkynthoh beiῆ bad ki jingbyrngem byrsit kiba laiphew rukom. Ka jingpynsaphriang ia kane ka video ka dei ka jingthad rong bad ka jingleh kaba ym lah ban pdiang. Ka jingkynthoh beiῆ ne jingbyrngem ka dei ka jingsloit ia ka longrynїeng jong ka samla bad ka long pyrshah ia ka aiῆ bad ka hok jong ka briew ban im jar jar katba ka sngewbit sngewmon ka mynsiem jong ka. Nalor nangta, ki commentary ne ki jingpynshai shynna ne ka sneng ka kraw shaphang jong ka jingim ne jingleh jong ka long ka jingleh bym dei.

Ka long kaba sngewdiaw ba ka jingbeiῆ, jingkhoh bad jingbyrngem byrsit ia ki kynthei ha ka imlang sahlang jong ngi, i kumba kam kut trai shuh. Ha madan, ha lynti syngkien, hapoh їing, ha ki jaka trei bad ha ki rynsan social media ka jingῆiew poh dor ia ki kynthei ka nang jur, wat la ki la don ki aiῆ kiba lah ban pynshitom ia ki nongleh bymman pyrshah ia ki kynthei. I kumba kiba mlien ban ῆiewpoh bad thombor ia ki kynthei ki kmen toh hoh bad kim sngewrem satia.

Mynta kumne haba ngi rung sha ka taїew kaba khuid bad kaba jar jar, ka dei ruh ka por ban їeng bad wad ki jingїada lyngba ka aiῆ na ka bynta ki kynthei. Hoid ha kajuh ka por ruh ka imlang sahlang ka dei ban kyndit bynriew ban ym ailad ba ka jingῆiewpoh dor ia ki kynthei kan їai bteng. Ka jingbyrngem, ka jingkheiῆ poh, ka jingthombor bad jingleh be ijot kam dei ka lynti sha ka jingbha.

La suh lang hangne ia ka FIR.

Khublei

Kyrsoibor Pyrtuh