Sdang ki pulit, ban kthong ia ki dkhot ka “Lawei ba phyrnai”

Shillong: U Deputy Inspector General of Police (DIG) Eastern Range u Davis Marak u la iathuh ba na ka liang ka tnad pulit ka la shim khia ban tohkit ban lap ia ki briew kiba la kam ia lade ba ki dei na ka kynhun “ka Lawei ba phyrnai”.
Haba la kylli, la ka don kano kano ka sabut ia kane ka kynhun, u la ong “Ym pat lah ban iathuh eiei halor kane ka bynta, namar ba ka jingtohkit ka dang iaid shakhmat.

U la iathuh ruh ba ia kane ka case la aiti ha ka tnad jong ka Cyber Wings bad ka crime branch ban leh ia ka jingtohkit ban lap ia ki briew ba donbynta ha kane ka kam pyntriem.
U la bynrap ruh “Na ka liang ka tnad pulit ka la shim khia ban tohkit ia kane ka kynhun ban lap ia ka jingshisha halor kane ka case”.
Haba kylli halor ka jingdonkti ki dkhot ka HNLC, na ka liang une u heh pulit u la ong “Ngam pat lah ban ong eiei mynta halor kane, namar ba ka jingtohkit ka dang iaid ban lap ia ki ba donkti” .
Halor ka jingpahara ia ki jaka ba la shah byrngem ban pynbthei, na ka liang u Marak u la ong ba ka tnad ka la ai ka jingbthah sha baroh ki District ban long kiba peitngor halor kane ka bynta.

“Ngim lah ban iathuh ia ka jingtohkit jong ngi kumno kan long, hynrei ka jingtohkit ka dang iaid shakhmat “u la bynrap shuh shuh.

Lah ban kdew hangne ba ka kynhun “ka Lawei ba phyrnai”, ka la thoh da ka shithi sha u myntri rangbah ka jylla u Conrad K Sangma, da kaba kam, ba utei uba dei u dkhot jong katei ka seng, u la dei kham mynshwa u nonghikai, uba shah beh kam noh bad la ong ruh ba katei ka seng, ka dei ka seng jong ki nonghikai, kiba la bret noh ia u khulom bad kiba la pyndonkam thymmai noh da ka suloi AK 47. Katei ka seng, ha ka email, ba ka phah sha ki kotkhubor, ka dawa ban pyllait noh mardor ia U bah Julius K Dorphang, ha ka por 10baje mynmiet jong ka 9tarik Iaiong 2022 ha ISBT Platform. La ong ruh ba lada ka sorkar kam pyllait, kumta kin pynbthei bom shwa ia kawei ka school Lower Primary. Ha katei ka email, ka bym shym la ai kyrteng, la ong, ba ka sorkar, kan nym lah ban thwet ia ki IP adress jong ki nongialam katei ka seng, namar ba ki pyni ba IP address ka dei 114.143.108.143, hadien kata kan poi sha ka 158.144.109.170 nangta sha ka 152.57.86.143 bad hadien kata kan poi sha ka 158.144.114.36 , 103.226.236.243, 158.144.59.70 bad nangta sha ka 114.143.108.89.