Leit kem ki pulit ia arngut ki suba nongtuh, kaba la bat da ki paidbah ha Umsawkhwan

Nongpoh: Hynnin ka miet ha ka por 10 baje ei ei mynmiet, ki pulit ka Umiam Police Station, ki la leit ban shimti ia arngut ki briew, kaba la bat da ki briew ka shnong Umsawkhwam, Ri Bhoi, kiba la shah bat halor ka jingkynnoh ba ki la donkti ha ki kam ban tuh ia ki tiar kali, kiba kynthup ia ki Radiator, Head Gasket, Cell, Silencer na kawei ka jaka kaba don hapoh katei ka shnong.

Ka jingtip kaba la iohlum, la ong ba ki pulit tang mar ia ioh jingtip na u rangbah shnong, ba ki briew ka shnong ki la ioh ban bat ia arngut ki suba nongtuh, kumta ki la leit mar mar sha katei ka jaka, ha kaba ki la lap, ba la don shibun ki tiar kali, kaba kitei ki suba nongtuh, ki la dep ban thep ha kawei ka Auto-Truck kaba don ia u number ML-05-H-0896, ia kaba la kynnoh ba la niah da uwei na kitei kiba la shah bat ha ki paidbah.

Haba la lap ia kitei ki tiar, ki pulit ki la rah noh sha Thanad ia kitei ki suba nongtuh lem bad ia katei ka kali kaba la kit ia kitei ki tiar. Haba iadei bad katei ka jingjia, ki pulit kin dang pynlong ia ka jingtohkit, kitei ki arngut kiba la shah bat ha ki paidbah bad shah kem noh ha ki pulit, ki la shah pynhap ha ki kyndon U/S 379/34 IPC.