Khang sa ka kashari, ban thung kam ha ki ophis sorkar jylla

Ka Meghalaya High Court, ha ki khyndiat sngi ba ladep, ka la khang pyrshah ia ka sorkar Jylla, ba kan thung kam ha ki ophis sorkar, lada kam pat lah ban pynbeit thikna, halor ka jinglong jingman jong ka bhah thungkam, hapdeng ki trai jylla lane kaba ki khot ha ka ktien ka kashari, ka roster system.

Katei ka hukum jong ka kashari, ka la long kumba bom da u nembah ia ki shnat treikam ka sorkar jylla, kiba dang pynkhreh ban thung briew, ha ki tnat bapher ha shwa ka elekshon MLA 2023 bad ngim tip, la ka sorkar jylla, kan lah ne em ban pynbiang mar mar ia kitei ki jingkwah jong ka kashari bad lada ki lah, kumta, kan long ka jing kyrkhu ia ki samla, kiba la thynrang eh, ban don la ki kam ki duk.

Ka jingmut kaba shai bha (na kaei kaba lah ban sngewthuh), ka long ba na kino kino ki kam, kiba lait, ka dei ban don ka jing pyn thikna, ba katei ka kam, kan trei kam katta ngut, ia ki Khasi, Jaintia bad katta ngut ia Garo bad hangtei ka wan ruh, sa ka kyndon kaba shai, na bynta kito ki kam, kiba sahteng, lada jia ba ym lah ban pyndap ia katei ka bhah.
Haduh ha kine ki sngi, la ju tip bha, ba ki don bun ki kam, kiba sah bad kiba hap ban iai ap, tad haduh ba kin da don ki briew, kiba tbit ban shimti ia katei ka bhah jongki lane kaba mut ba lada ka don 50 tylli ka bhah jong ki Garo bad ki don pynban tang 10ngut kiba lah don ka kyrdan ban shimti ia katei ka kam, kumta ka sorkar jylla, kan hap ban ap, tad haduh ban da pyndap sa 40ngut kiwei pat bad katba kim pat don, kumta kitei ki kam, kin shu sah thylli.

Ka jinglong jingman jong kane ka bhah kam bhah jam, ka la jyrsih shibun eh, namar ba ki MLA Khasi (naduh ki 50 snem mynshwa), ki shu kylla long ki niang kohnguh, namar ba na ka bhah kam, ka poi ruh sa sha ka bhah leit pule sha ki kyrdan doktor, engineer bad sha ka jingkiew kyrdan ha ki kam bad ka dei kane ka jingdkoh, kaba plie lad ia ki nongtrei kiba tlot bad kiba la shu shah jied pyndep rukom, tang ban pyndap ia katei ka bhah kaba sah thylli bad ka rai jong ka kashari, ka la biang eh, ba ka bom syndon da u nembah, ban pynpei shkor ia ka sorkar jylla.