KHASI NATIONAL AWAKENING DAY: KA SNGI KYRSIEW RI

La pynkhreh bad pynbit pynbiang da ka Media Unit jong ka Khasi Students’ Union (KSU) 2019

Sha baroh ki parari, ki paradoh parasnam, ki longkmie ki longkpa, ki hymen ki para, ki samla shynrang samla kynthei bad ki hep kiba dang khie ha ka rta.

Kumba ju long hi, phi ju tip ba ha ka 4 tarik u Iaiong man la u snem ka Khasi Students’ Union (KSU) ka ju rakhe ia kane ka sngi kum kata ka Sngi Kyrsiew Ri lane ka Khasi National Awakening Day da kaba pynlong ki kynja prokram kiba pher ba pher kham bun hi da ki jingiaiaid paidbah ryngkat bad ki jingiarisa paidbah lem bad ka ksing ka dhah, ka put ka tem bad ka rwai ka siaw ha la ka khor ka riam tynrai. Niuma, ka pyrthei ka tip ba ha kane ka sngi ka KSU ka ju pynlong ka jingiaiaid paidbah hynrei kham bun na ngi pat ngim ju poi kynmaw ba balei la rakhe kyrpang ia kane ka sngi bad kaei ka jingkordor jong kane ka sngi. Lyngba kane ka kot lyngkdop ka KSU ka wanrah shaphi khyndiat khynsoit i jingpashat bad jingbatai bniah halor ka daw tynrai jong kane sngi ba kyrpang u Khasi.

Balei ha u 4 tarik jong u Iaiong?
Shispah khyndai phew (190) snem mynshwa ha ka spah snem kaba khatkhyndai (19th century) ha kane ka sngi la khie ka thma kaba jur hapdeng ka sorkar Bilat (East India Company) bad ki hima Khasi hapoh ka jinglam khmat jong ka Hima Khadsawphra kaba la synshar da u Syiem Tirot Sing Syiemlieh. Ia kane ka thma la tip kum ka 1st Anglo-Khasi War da ka pyrthei bad ka dei ka thma kaba shyrkhei kaba neh slem bha ha ka juk jong u Khasi. Ia i phylliah ding jong kane ka thma kaba jur la pynklang da ka jingiakynad kaba jia ha ka 4 tarik u Iaiong jong u snem 1829 ha shnong Nongkhlaw hapdeng ki shipai jong u Pa’iem Tirot Sing bad ki shipai ri thor jong ka sorkar Bilat. Kane ka jingiakynad ka mih hadien ka jingshah ban bein, ka jingshah thombor, ka jingshah khein poh bad ka jingshah shet kylla ki paid Khasi ha ka sorkar Bilat kaba la lamkhmat da u sahep David Scott uba long u Commissioner jong ka Assam Province.

Ki jingjia ha shwa ka 4 tarik u Iaiong 1829
Ka jingiatyngkhuh kaba nyngkong duh hapdeng ki Khasi bad ka sorkar Bilat ka la jia ha u snem 1774 ha kaba ki shipai ka Bengal Native Light Infantry kaba la ialam da u Captain Elliker ka la hair thma ia ka Jaintiapur kaba dei ka nongbah jong ka Hima Sutnga tang namar ka jingiakajia khappud hapdeng u Syiem ka Hima Sutnga bad ka sorkar Bilat hapoh ka Sylhet Province. Hadien kane shibun ki jingiapher jingmut bad ki jingiakynad ki la mih hapdeng ka sorkar Bilat bad ki Hima Khasi kum ka Hima Sutnga, Hima Nongstoin, Hima Langrin bad kumta ter ter. Ha u snem 1824 hadien ka jingiasoi soskular u Pa’iem Ram Sing jong ka Hima Sutnga bad u sahep David Scott, ki kynhun shipai jong ka 23rd Regiment jong ka Bengal Native Light Infantry ki la ksam lyngba ka Hima Sutnga ban leit na Sylhet sha Nowgong (Assam). Kane ka dei ka sien kaba nyngkong ba ki shipai ka sorkar Bilat ki la iuh kjat ha ki lum Khasi bad dei ha une hi u snem ba ka sorkar Bilat ka la long kynrad ia ka Hima Sutnga.

Ka ‘Treaty of Yandaboo’
Ha kaba sdang jong ka spah snem kaba khatkhyndai (19th Century) ka la khie ka thma hapdeng ka sorkar Bilat bad ka Hima Burma kaba la neh bun bun snem. Ki la don ruh ki jingiakynad hapdeng ka hima Ahom (Assam) bad ka hima Burma ha kine ki snem. Hapdeng kine kiei kiei baroh ka la don ka jingiasngewthuh jingmut hapdeng ka hima Ahom bad ka sorkar Bilat ha kaba iadei bad ki kam sain hima sain sima kum shi bynta ban ialeh pyrshah ia ka hima Burma.

Kane ka thma hapdeng ka sorkar Bilat bad ka Hima Burma ka la kut noh hadien jong ka jingiasoi soskular hapdeng kine ki ar liang mamla ha u snem 1826 kaba la tip kum ka Treaty of Yandaboo. Hadien kane ka soskular ka sorkar Bilat ka la kurup noh ia baroh ki jaka kiba hap hapoh u pud u sam jong ka hima Ahom kiba hap mynta hapoh ka jylla Assam. Lyngba kane ka jingioh long kynrad ia ka hima Ahom, ka sorkar Bilat ka la sngew donkam ban pyniasoh noh ia ka ri thor Brahmaputra (Assam) bad ka ri thor Surma (East Bengal) kiba long ki nongkynti jong ka sorkar Bilat. Hapdeng kine ki ar tylli ki ri thor ki don ki lum Khasi kiba la synshar laitluid da ki syiem Khasi khlem don kano kano ka jingtuklar da ki bor kiba shabar kiba kynthup ia ka sorkar Bilat.

Ka surok na ri thor Brahmaputra sha ri thor Surma
Ka sorkar Bilat ban suk ka leit ka wan hapdeng ka ri thor Brahmaputra bad ka ri thor Surma ka la sngew dei ban tei noh da ka surok ka ban ksam lyngba ka Hima Nongkhlaw. Khlem da pynsepei ia ka por, u Commissioner ka Assam Province, u sahep David Scott u la phah ktien ban ia soi soskular ia ki Syiem Khasi ban shna ia kata ka surok lem bad ki ktien jali ja-um bad ka phon ka pynbiej ha kaba ia dei bad ka roi ka par bad ka shongsuk shongsain khlem da tuklar ne pynthud ia ka iktiar bad ka bor synshar jong ki Syiem Khasi ha la ki jong ki Iit ki Hima. Kane ka surok kan sdang na Ranikudam (Assam) bad kan ksam lyngba na Jirang sha Nongkhlaw sha Sohiong bad khun sha ka thain shathie kum ha Sohrarim, Sohra bad ter ter haduh ba kan da kut ha Chetak ha Sylhet.

Ki Syiem Khasi baroh ki la mynjur ban ai jaka ia ka sorkar Bilat ba kan tei ia katei ka surok ka ban ksam lyngba ki hima ki jong ki. Kumjuh u Pa’iem Tirot Sing hadien ki jingiasyllok kiba janai bad ka dorbar hima kiba la shim por da ki bun bun taiew, u la mynjur ban ailad ia ka sorkar Bilat ba tei ia ka surok ka jong ka lyngba ka hima Nongkhlaw da kaba ia soi ia ka soskular bad u sahep David Scott ha ka 3 tarik u Naiwieng 1826. Kane ka soskular ka iadei beit thik tang ha ka ban tei ia kata ka surok bad kam don jingiasoi eiei ha kaba ia dei bad ka jingaiti noh ia ka hima sha ka sorkar Bilat.

Ka Bengal Native Infantry
Ban pyniaid beit iaid ryntih ia ka synshar ka khadar hapoh u pud u sam jong ka East India Company, ka sorkar Bilat ka la pynkha ia ka Bengal Native Infantry ha u snem 1757 kaba long ka kynhun shipai kaba kynthup ia ki jaidbynriew na ri thor. Ka Bengal Native Infantry ka kynthup ia ki shipai langrut (sepoys) kiba dei ki jaidbynriew na ri thor kum na them Surma, ki Non Commissioned Officers lane ki Havildars bad Naiks, ki Native Commissioned Officers lane ki Subedars bad Jamedars kiba dei na ki jaidbynriew na ri thor, ki Commissioned Officers bad ki Sergeants kiba dei ki dohlieh.

Kane ka tnad shipai ka don bun tylli ki Regiments kiba ka sorkar Bilat ka buh ha kylleng ka British India (India, Pakistan bad Bangladesh). Jan baroh ki shipai ki dei beit ki briew na ri thor kum na Bengal bad ki Gorkha. Kane ka tnad shipai ka peit ruh ia ka synshar ka khadar ha ki lum Khasi hadien ba ka sorkar Bilat ka la knieh ia ka bor synshar na ki Syiem Khasi bad dei ia kane ka kynhun shipai bad ki hima Khasi kynthup ia u Pa’iem Tirot Sing, u Pa’iem Sngap Syiem bad u Woh Kiang Nangbah ki la ia khun pyrshah.

4 tarik u Iaiong 1829
Kumba la maitphang ha kaba sdang, ka jingiapher jingmut hapdeng ki Khasi bad ka sorkar Bilat ka la mih hadien jong ka jingthmu ka sorkar Bilat ban tei ia ka surok lyngba u pud u sam ki hima jong ki. Kane ka jingiapher jingmut ka mih hadien ka jingbym burom ka sorkar Bilat ia ka soskular ba ka la ia soi bad ki Syiem Khasi. Shuh shuh nalor kane ka la don ruh ka jingleh donbor jong ki shipai na ri thor pyrshah ia ki Khasi khamtam hapoh ka hima Nongkhlaw. Ki shipai na ri thor ki la pyndik ia ka iaid ka ieng ki khynnah bad ki kynthei, ia ki nongtrei surok kiba dei ki Khasi ka ju don ka jingleh bein bad jingkhein poh.

Ka sorkar Bilat hapoh ka jingialam u sahep David Scott ka ju ialeh pyrshah ia ki jingangnud u Pa’iem Tirot Sing bad ka ju ia snoh kti bad ki nongshun ka hima jong u. Shuh shuh khlem da burom ia ka soskular, ka sorkar Bilat ka la sdang ban tei ia ki iing sah kiba skhem bad kumjuh ruh ki kut shipai kiba khlain kiba long ki dak ba ka sorkar Bilat ka thmu ban klun noh ia ka hima Nongkhlaw bad kiwei ki hima Khasi da ka bor. Nalor kine ka la don ruh ka khubor bad ka jingbyrngem na ki nongtrei ka sorkar Bilat kiba wan na ri thor ba lada ki Khasi kim nguh ia ki kin ber bih ia ki sahep doh lieh ban yn sdang noh ka jingkhrong khajna na baroh ki paid Khasi.

Ki jingshah pyndik kiba man ka por ki la pynlong ia ka hima Nongkhlaw ban khot ia ka dorbar bah bad ha kane ka dorbar ki paidbah ki la dawa na u Pa’iem Tirot Sing ba u dei ban pynher krad noh mardor ia kine ki nongwei kiba wan ban iuhroit ia ka hok longtrai ki khun Khasi ha la ka khyndew ka shyiap. Dei halor kine kiei kiei baroh ba u Pa’iem Tirot Sing lem bad kiwei ki hima Khasi ki rai kut jingmut da kawei ba kin ia khun pyrshah da ka jingkheinduh pyrshah ia ki tup ki man bad ki suloi badonbor jong ka sorkar Bilat.

Ha ka 4 tarik u Iaiong 1829, U Pa’iem Tirot Sing lem bad kumba 500 ngut ki rangialeh ka hima Nongkhlaw ki la hiar thma kyndit ia ka kut shipai jong ka sorkar Bilat ha Nongkhlaw ha kaba ka la jia ka jingiaumsnam kaba jur bha. Ha kane ka jingialeh, ki rangsatar jong u Pa’iem Tirot Sing ki la ioh ban pyniap ia ar ngut ki heh shipai dohlieh jong ka Bengal Artillery kiba kynthup ia u Lieutenant R. Bedingfield bad u Lieutenant Phillip Bowles Burlton. Ki shipai ka hima Nongkhlaw wat la ki la duh bun ki mynsiem napdeng ki jong ki hynrei ki la ioh ruh ban pyniap haduh 50-60 ngut ki sepoys ne ki shipai langrut kiba na ri thor.

Kane ka jingjia ha ka 4 tarik u Iaiong 1829 ka long kumba iuh tdong bsein ia ka sorkar Bilat kaba donbor haduh katta katta. Hadien kane ka jingjia ki heh shipai jong ka sorkar Bilat ki la phet lut na hima Nongkhlaw bad ka sorkar Bilat mar mar ka la phah ki pyrton shipai na ka Bengal Native Infantry ban tehlakam ia ki hima Khasi kynthup ia u Pa’iem Tirot Sing. Hapdeng jong ka jingkhlain bor bad biang ki tiar ialeh katkum ka juk, jong ka sorkar Bilat, ki paid Khasi ki la iakhun dohiap dohim da ki waitlam, ki sum, ki khnam, ki ryntieh bad hateng hateng da ki suloi ba ki ioh knieh na ki shipai ka sorkar Bilat. Kane ka thma ka la neh haduh 4 snem kynthih tad haduh ka jingshah kem noh jong u Pa’iem Tirot Sing ha u snem 1833 ha kaba la pynryngkang par ia u na ka ktem shipai ha Mairang sha Guwahati bad khatduh sha phatok ha Dhaka ha kaba u la khlad noh na ka pyrthei ha ka 17 tarik u Naitung 1835 hapdeng ka jingshitom kaba jur.

Ka jingkyntu kynpham ia ki paradoh parasnam
U Pa’iem Tirot Sing haba u la don ha kti ki nongshun u khlem pyndem wait da kaba kular ban aiti noh ia ka hima sha ka sorkar Bilat hynrei u la ieng rangbah beit haduh ki sngi kiba khatduh jong ka jingim ka jong u.

Paradoh parasnam, ka 4 tarik u Iaiong ka long ka sngi kaba kyrpang bha ha ka histori jong ka Jaidbynriew jong ngi. Namar dei ha kane ka sngi ba ka mynsiem ialeh ka klang bad ka rhem ha ka mynsiem jong baroh ki khun Khasi Khara. Wat hapdeng ki jingpyntieng kohtympan kiba bun jait na ki riewkhawpud bad ki myndie ri kiba la maham ia ka jingkhlain bor ki nongshun, hynrei ki khun ka Bri U Hynniewtrep khlem riej bad khlem don jingtieng tang khyndiat ruh ki la lenlade bad pha ia la ka jingim na ka bynta ka lawei kaba laitluid, ka lawei kaba phyrnai bad ka lawei ha kaba ki lah ban im ha ka burom. Halor kane ka phang ba ka KSU ka pdiang ia kane ka sngi kum ka Sngi Kyrsiew Ri lane ka Khasi National Awakening Day.

Ka Khasi Students’ Union (KSU) ka pynsngew ha phi ki para Khasi kiba kynthup ia u Khynriam, U Pnar, U Bhoi, U War, U Maram, U Lyngngam bad U Diko kiba don ha satlak ka pyrthei ba wat la ngi long ka Jaidbynriew kaba rit hynrei lada ngi long kiba la pynkhreh bad kiba im ha ka jingiatylli bad ka jingiasngewthuh jingmut, yn ym don kino kino ki bor ha ka pyrthei kiba la ban knieh ia ka pliang ja ka jong ngi bad ia ka hok ka jong ngi ha la ka jong ka khyndew bad ka shyiap.

Hadien kane ka thma jong u Tirot Sing, ka Jaidbynriew ka la mad ruh sa ia ka thma jong u Sngap Sing Syiem bad u Woh Kiang Nangbah kiba ieng rangbah ban ialeh pyrshah ia ki nongshun. Hynrei to tip ko parari ba haduh kane ka khyllipmat kaba mynta ka Jaidbynriew ka dang ialeh pyrshah ia kiba bun jait ki thma kiba jar jar kiba wan ban bam kruin ia ka Jaidbynriew bad ka KSU ka khot ka iawer ia phi baroh lang ba ngin long kiba shemphang bad kiba iohi jngai da kaba ngi buh shwa ia ka Jaidbynriew ha khmat jong kiei kiei baroh.

MAIT SHAPHRANG KHLUR KA RI

“BAN IM KA RI NGIN YM SHONGTHAIT, BAN SHNGAIN KA RI NGIN LONG KHLAWAIT”

KHUBLEI SHIBUN