Ka jingbiej spah palat jong ngi ki khun u Hynniew Trep ka pynklet noh ia ka lawei jong ki khun ki ksiew lajong. Ban ioh long minister 5 snem ne wat tang shi snem ruh imat la lah ban ioh kynshew spah da ki phew bad spah klur, namarkata, yn leh aiu kita ki khun ki ksiew haba la biang ka spah? Kynmaw ho ba ka spah khamtam ka spah bym da jaw syep hok kan nym neh slem bad tang katto katne por ka rngad noh katba ka pateng pat ka nang tlot nang swai katba nang iaid ki sngi ki snem.
Lah kham bun snem mynta ba nga la pynmih ha ki kot khubor da kaba kyntu ia ki nongmih khmat Hynniew-Trep ban ia tylli kawei na ka bynta ka jingmyntoi bad ka bha ka miat jong ka jaid bynriew lajong – kampher la phi don ha kano kano ka seng ne ka party lane la phi don ha ka liang synshar ne ha ka liang pyrshah na ka bynta ka jaidbynriew dei ban ia ieng tylli kawei ha kaba shim rai ia kano kano ka mat kaba iadei bad ka jingmyntoi bad ka bha ka miat jong ka jaidbynriew lajong – hynrei kane ka jingkyntu kam shym la poi sha ki shkor jong ki Nongmihkhmat Hynniew-Trep jong ngi ne ki sngew ba kham lah kaba lum spah bad kham lah kaba long mraw ban ia kaba long kynrad.
Ha ka jingshisha kat kumba iohsngew na shane – shatai na ka khlieng ka tyngab namar ka jingpyrshah jur jong u Bah Hoping Stone Lyngdoh (bam kwai ha Dwar u Blei) ia kane ka reservation policy – 40% ia ki Garo, ki nongialam jong ka seng APHLC ha kata ka por ki la rai ba ia kane ka reservation yn pynneh tang hapoh ka 15 snem ban ailad ia ki paralok Garo kiba dang sahdien palat ha ka por ba ioh ia ka jylla Meghalaya ba kin kham kiew bad kham roi ha ka liang ka pule dangle bad ha ka liang ka iohkam – iohjam – pynban kane ka Reservation Policy jong ka Meghalaya ka neh ka sah haduh mynta bad imat – ym lah shuh ban pynkylla.
Mynshuwa ruh, u Bah H.S Shylla (ba la iap) u la wanrah ia kane ka mat 40% ban iatai bad ban pynkylla noh hapoh Assembly hynrei ka la shah kyntait noh namar ki nongmihkhmat Hynniew-Trep jong ngi ki dang biej shuki minister palat bad kim sngewlah ban shong lyngknot – MLA namar to long katba long maphi ki khun u Hynniew-Trep kampher tang ba ioh shong shuki mraw ki nongmih khmat jong phi ka la biang.
Mynta sa i Bah Adelbert Nongrum i la pyrshang ban wanrah ha Assembly ban iatai shaphang kane kajuh ka Reservation Policy ne ka 40% ia ki Khasi-Jaintia bad 40% ia ki Garo namar ka la ktah shaba palat ia ngi ki khun u Hynniew-Trep kiba kham bun paid ban ia ki Garo naduh ba sdang ioh ia ka jylla Meghalaya haduh mynta mynne hynrei ki nongmihkhmat Hynniew-Trep kim pat shym la sngewthuh satia wat ia ka jingiapher hapdeng u 36 bad u 24 ruh. Ha ki nongmihkhmat Hynniew-Trep, u 24 u kham heh bad kham kordor shibun ban ia u 36 – kata ka dei ka jingstad jong ki.
Namarkata, ko ki paidbah Hynniew-Trep – Hynniew-Skum sngewbha ban ia ngam kham jylliew ha ka jingmut-jingpyrkhat jong phi baroh ki khun u Hynniew-Trep – u Hynniew-Skum wat nym kwah shuh ban dang long mraw sah hapoh ka jaidbynriew Garo kaba kham rit paid bad kiba dang kham sahdien ban ia ngi. Ieng tylli ba lada ym lah ban pynkylla ne pynduh noh ia kata ka 40% ia ngi ki Khasi-Jaintia bad 40% ia ki Garo, ka la bha shibun eh ban ia khlad noh shi syndon bad ki paralok Garo, kata ban ia ioh ia la ka jong ka jylla.
Ngi ngin dawa ia ka jylla Hynniew-Trep la ka jong bad ki Garo pat da ka jylla Garo ne Achik jong ki. Ngim dei shuh ban ia shong ia sah ryngkat bad kine ki jaidbynriew ki bym don jingsngew ei ei ia ka jaid bynriew jong ngi watla ngi iap lut baroh ruh. Ma ngi, ngi sngewsynei ia ki ba ki dang sahdien palat ma ki pat ki bishni pynban ia ngi ba ngi la kham long sha khmat ban ia ki. Kane ka la dei kata ka kyntien ba ki ong, “Wat ju pynsyaid ia u bsein namar u tang shu syaid un sa puh kylla”. Ma ngi kum ka jaid bynriew Hynniew-Trep ngi la dei ban sngewthuh naduh mynta ba ngim dei shuh ban shu ieit biej ia ki party ne ia u candidate u bym don jingsngew ia la ki doh ki snam lajong, uba leit pynshong shit sha ki party khyllah jaid ne ki party ia khleh khawlang bad kiwei pat ki jaid bynriew khyllah. Dei ban ieit shwa ialade bad la ka long kumno kumno ruh ngin ialeh ban pynneh pynsah bad ban kyrshan met bad mynsiem ia ki party lajong jong ka jaidbynriew Hynniew-Trep ka bym don jingiakhleh lang shuh bad kiwei pat ki jaidbynriew bad dei tang kata ba ngin ioh ban bat ia ka bor synshar. Lymda kumta, ngin sa sah long mraw junom ha ki khar Garo. Namarkata lada long katba long ngi dei ban pynjop baroh 36 seats tang ia ki party Hynniew-Trep.
Pynduh noh ia ka jingiabishni para ma ngi khnang ba ka jaidbynriew Hynniew-Trep kan khie im biang bad ba ngin ioh long kynrad ha lade bad halor jong kiwei pat ki jaidbynriew.
M.S. Ryngksai, Dawki
Ka biang bha kaba ph ong bah