Yn kiew dor noh, ka bai rung shongkai ha Park

Shillong, 21 Naitung:
Ka tnad WildLife ka jylla ka la kamai kum ba 15 lak eiei ha ka shi snem na ka park bad ia kane ka la ioh na ka jing shim bai rung na ki nong wankai ha ka shi snem.
Hynrei kane ka jing kamai kam pat dap satia tang ka bai bsa jingbam ia ki mrad kiba don ha katei ka park.
Haba iakren hynne ka sngi Hatmajai bad u Divisional Forest Officer (DFO) ka Khasi Hills Division u Bah WS Marngar u la iathuh ha ka shi snem ka jingioh lum na ki nongwan iaid kai ha kane ka park kaba don ha nongbah Shillong kam pat lah ban pyndap ia ka jingdonkam ban thied jingbam ia ki mrad bad namar kane, ka tnad ka la hap ban sei shuh shuh.
U la ong ba kane ka park, kam dei ka jaka ri mrad hynrei tang ka jaka ban pynlait im ia ki mrad kiba wanrah ki briew ne ba ioh kem na kiwei ki jaka.
“Kane ka park ka dei tang ka jaka ban pynlait im ia ki mrad kiba ngi ba la wan aiti da ki briew haba ki ioh kem ia ki mrad ne don kiba ri hynrei ki wan aiti noh ia ki mrad”, la ong u Bah Marngar.
Hapoh kane ka park, ki don ki mrad, kum ki dngiem, skei, khiat, ki jait sim bapher bapher.
U Bah Marngar u la iathuh ba ka tnad ka la rai ban pynkiew noh ia ka dor bai rung ha Park na ka T.2 sha ka T. 5 ia ki khynnah bad na ka T. 5 sha ka T. 10 ia ki rangbah shi khlieh.
Ia ki jingbam ia ki mrad la aiti katkum ki jingbam jongki bad ia ki jingbam la ai da u nongsam ba la jied da ka tnad.
Kane ka park ka dei kawei na ki jaka shongkai bad lehkai khamtam ia ki khynnah ha kane ka nongbah bad wat kito kiba wankai na kiwei ki jylla haba ki wan jngoh ia ka nongbah Shillong.