Nongpoh: Ki samla Khasi na ka shnong Khyndewso, kiba la mynsaw ha ka jingshah shoh ha ki briew hapoh ka shnong Jatalong, kaba ki la kynnoh ba ki la shah shoh ha ki briew na ka jaidbynriew Nepali, ki la ong ba ki la shu shah shoh khlem da tip ia ka daw halor ka jingshah shoh jong ki bad kiba pynpaw ruh ba haba ki la thmu ban leit iakren ban iashai halor katei, ki la shah khyrwit kylla pynban, tad haduh ba kin da mynsaw jur.
Haba iakren bad u samla Sidron Mukhim, uba dei u samla uba tip lut ia ka sdang ka kut jong katei ka jingjia, u la ong ba katei ka jingjia ka la sdang ha ki por janmiet bad kata ka la jia ha ka por kaba ma u lem bad 2 ngut ki paralok jong u, ki la thmu ban leit sha kawei ka shnong kaba don hakhmat ka Jatalong, hynrei haba ki poi ha Jatalong, ki la sangeh ia ka kali ban leit thied jingthied na kawei ka dukan kaba don ha katei ka shnong.
La ong ba ha katei ka por kaba ma u lem bad u paralok ki dang thied jingthied na katei ka dukan, la don ki briew kiba la leit ban shoh ia u paralok jong ki, uba dang ieng ha surok bad haba ki la leit ban iarap ia u, kumta ki la shah shoh kylla pynban bad ki la kynnoh ruh ba kitei ki Nepali, ki la pyndonkam da ki tiar ba pynmynsaw ban shoh ia kitei ki samla Khasi.
Ki la iathuh ruh, ba hadien ba ki la lait na katei ka jingshah shoh, ki la pyntip ia ki para samla napoh ka shnong Khyndewso bad kiba la leit leit sha katei ka jaka kaba ki shah shoh, kata na ka bynta ban iakren iashai halor katei ka jingshah shoh jong ki, hynrei haba ki la poi ha katei ka jaka, ki la lap bad iohi ba la nangbun ki briew kiba dei ki Nepali bad ha katei ka por, ruh ki la shah khyrwit kylla.
Ngim dei ban shaniah palat ia ki bor jong ka aiñ ban wan iarap ia ka jaidbynriew jong ngi…hynrei Ngi dei ban mih iada dalade ialade da kaba niom tyngeh ia ki nongshun ka jaidbynriew jong ngi..