Shisnem, la wan U Amit Shah, ki trai kim pat ioh bai kali

Shillong:U nongwad jingtip paidbah, U bah Disparsing Rani, u la buh ia ka jingkylli ia ka tnad Transport jong ka sorkar jylla, ba ka jah ka pisa, ban siew ia ki 400 tylli ki kali kiba la shim wai da ka tnad sorkar ha ka sngi ba wan u Myntri kam pohing ka sorkar pdeng sha ka jylla.

Haba ia kren bad ki lad pathai khubor, na ka liang u bah Rani u la ong ba u kwah ban kylli ia ka tnad transport ba shaei ka jah ka pisa kaba ka tnad ka dei ban siew ia ki ki trai kali ki ba la ai wai ia ki kali ban pyndon kam da ka tnad sorkar jylla, na ka bynta ka jingwan u Myntri kampohing ka sorkar pdeng, U Amit Shah sha ka jylla, na ka bynta ka jingialng ka NEC ha nongbah Shillong.

“Mynta la shisnem, kane ka tnad kam pat siew ia ka pisa kaba long T.22 lak tam sha ki trai kiba la ai wai ia la ki kali ban pyndon kam da ka tnad sorkar ha ka 23 bad 24 tarik u kyllalyngkot na ka bynta ka jingialang jong ka NEC ha Shillong” u la ong.
U la bynrap shuh shuh “Ha kane ka sngi ka Meghalaya Tourism Development Corporation ka la shim wai ia ki kali 400 tylli ki kali ban pyndonkam ha kane ka sngi, hynrei haba na ka liang ki trai ki ba la ai wai ia ki kali, ha kane ka sngi ki la leit ban wad ia ka pisa, hynrei na ka liang ka tnad transport ka la iathuh ba ka NEC ka khlem pat pyllait ia ka pisa jong ki”.

U la iathuh ruh ba dei hadien kane, na ka liang u bah Rani u la leitwad da ka RTI na ka NEC ban tip ia ka jingshisha ha kaba u la shem ba ka NEC ka la dep ban pyllait ia kane ka pisa sha u Commissioner ka tnad Transport.
“Dei na ka jingwad RTI ha NEC ha ka ba la lap ba ka NEC ka la dep pyllait ia ka pisa sha ka sorkar jylla lyngba u Commissioner ka tnad transport kaba long 22 lak tam, hynrei mynta la shisnem tam kane ka tnad kam pat lah ban pyllait ia kane ka pisa sha kine ki trai kali”u la bynrap.

U bah Disparsing u la phah ia ka RTI, sha kane ka tnad ban buh ka jingkylli ba shaei ka pisa ka jah, haba ka NEC ka la dep ban pyllait ia kane ka pisa.