Pdiang ka HNYF, ia ka jingjied ka HNLC ia u nongialam ka seng, ba un long kum u ksiang ha ka jingthmu iakren iasuk

Nongpoh:U bah Marcus Marten, Vice-President ka HNYF Sengkmie, u la pynpaw sha ki lad pathaikhubor, da kaba ong ba ka seng ka ai ia ka jingkyrshan kaba pura bad pdiang ruh ia u bah Sadon K. Blah, President ba rangbah ka HNYF, ba un shim ia ka bynta kum u Ksiang ban wanrah ia ka jingiakren iasuk hapdeng ka sorkar bad ka Seng Kieng atiar Hynniewtrep National Liberation Council (HNLC).

Katei ka jingai jingkyrshan da ka HNYF, ka la jia ruh hadien ba ka ki nongialam ka HNLC, ki la jied ia u bah Sadon K. Blah, ba un long kum u Ksiang ban wanrah sha ka miej jong ka jingiakren iasuk hapdeng ka sorkar bad katei ka kynhun Kiengatiar na Meghalaya.

U bah Marcus Marten, u la ong ba kum ka seng ka pynpaw ruh sha ki paidbah ka jylla ba ka kloi ban pdiang da ka seng ban pdiang ba u President ka seng un long u ksiang ka HNLC ha ka ban iakren iasuk bad ka sorkar, ka dei namar kum ka seng kaba shakri ia ki paidbah ha ka jylla ha ka bha ka miat, ka don ruh ia ka jingangnud ban poi noh sha ka lynti ka jingiakren iasuk ka sorkar Meghalaya, India bad ka HNLC, khnang ba ka jylla kan lait na ki kam pyntriem bad kiba ktah ia ka shongsuk shongsain ki paidbah ha ka jylla.

Ha kawei pat ka liang, utei u bah Marcus Marten, uba dei ruh u President ka HNYF, Northern Region, u la ong ruh ba ka seng ka dawa na ka sorkar Meghalaya ba kam dei ban shim sting halor katei ka jingthmu iakren iasuk da ka HNLC, kaba la don ia ka jingthmu ban poi noh sha ka miej jong ka jingiakren iasuk bad lada ka sorkar ka bakla sa ha kane ka kynti, kaba mut ka jingkynnoh kam dei shuh ia ka seng HNLC, hynrei ka jingkynnoh kan dei beit ia ka sorkar jylla.