Ka Dorbar Shnong Thangskai, ka la leh ia kaba dei eh: FKJGP

Khliehriat:Ka Seng FKJGP East Jaintia Hills District Khliehriat ka la ong ba ka Seng ka dap da ka jingsngewkhia kaba jur halor ka jingleh bym suidniew ka Dalmia Cement Ltd ia ka ei kaba ka Dorbar Shnong Thangskai ka la mana ban nym bret pathar ia ki plastic,ki jhep kaba long ka jingma kaba khraw ia ka mariang bad khamtam ia u briew ha ka ring bad pynhiar mynsiem.

Kum ka Seng, ka ong, ba ki bor pyniaid ka Dalmia Cement Ltd ki la iuhroit ia ka Shnong Thangskai bad ka long ia ka Jaidbynriew, ha kaba ki trai ka Company kiba dei ruh ki bar Jylla ki la khein dew thala bad leh katba mon ban pynsniew ia ka mariang, namar tang shu kut ka kam jong ki kin leit phai noh bad ieh tang ka jingjot bad ka jingma ia ki nongshong Shnong khamtam ia ka pateng ban wan, ong ka kyrwoh ka Seng.

Kumta ka la long ka por kaba dei eh ban nym aili ia ka Dalmia Cement Ltd bad ia kiwei de ki Company ban leh katba mon namar ka long kum ka jingkhein poh ia ka Dorbar Shnong,halor kane ka nongrim ka Seng FKJGP ka ai ka jingkyrshan kaba pura ia ka Dorbar Shnong Thangskai ban leh da kaba tyngeh ia ki bor nongpyniaid ka Dalmia Cement Ltd bad ka Seng ka kren shai ba lada ka bor Shnong ka donkam jingiarap ka Seng ka la long kaba kloi ban mih shakhmat ban kyrshan met bad mynsiem ia ka Shnong Thangskai bad khamtam ki nongialam ka Dorbar Shnong Thangskai ki dei ruh ki nongialam ka FKJGP East Jaintia Hills District Khliehriat kiba kynthup ia u Bah Alprins Dkhar uba dei ruh u Adviser bad u Bah Welking Swer,Vice President ka Seng hapoh East Jaintia Hills District bad lada jia kaei kaei kaba sniew ne ka jingjia ba sngewsih ia ki bad ia ki nongialam ka Shnong hi baroh ka wei ka Seng ka kren shai ba ki bor nongpyniaid ka Dalmia Cement Ltd bad ka ophis u Deputy Commissioner East Jaintia Hills District Khliehriat kin shim ia ka jingkitkhlieh ong ka khubor na ka Seng FKJGP.

Khadduh ka Seng pynrem jur ruh ia ka ophis u Deputy Commissioner,East Jaintia Hills District Khliehriat ka bym leh suidniew ia ka jingujor ka Dorbar Shnong Thangskai, namar da ka jingbym shimkhia ka ophis u Deputy Commissioner ka pynlong ia ka Dalmia Cement Ltd ban leh kiar ia ka Dorbar Shnong Thangskai pynkut ka kyrwoh khubor na ka Seng FKJGP ba la phah da u General Secretary,Bah D.H Sumer.