HA KA KUTLAD

P.B.S

[ba bteng] “Phim sngew ei ei em lada ngin leit rung dihsha hangtei ha Restaurant” u ong ia ka bad kdew ia kawei ka Restaurant rit kaba don ha syndah kawei ka beauty parlour
“Em, ym lei lei phi ngin ioh iakren kham bha pynban” ka ong bad ka wiat samrkhie.

U Hiram u pan da u chow 2 half bad 2 tylli ka special tea. Katba ym pat wanrah ia ki jingbam ki la kren ia kane katai. Hadien 7 minit la wanrah uwei u nongtrei uba lieh sniehdoh bad khap lyndum.
“Phi lah long Khristan em?” u kylli
“Hooid” ka la jubab
“To duwai noh ma phi” u ong
“To khap ki khmat” ka ong bad ka duwai
“Sngewtynnad ba ngi dei na ka kynhun balang khapbrip” u ong haba ka la ong Amen
“Kine kiba shongmarjan bad ngi imat ki da sngap bha haba ngi iakren” ong kata ka samla bad kdew artat ia kita ki arngut ki samla dkhar
“Ki mat ia sngap seh kim rat da sngewthuh hi re” ong u Hiram bad u taw mum mum ia u chow
“Kan pher aiu phi” ong ka samla bad ka khleh bha ia ka sos da ka proh
“Ban shu ia sngewtynnad kumne khlem da tip kyrteng sngew sammut pynban” ong u Hiram bad u kyrshan 2 tylli ki tymbuit bad ki sla kti ha tmoh
“Yn iathuh shwa mano?” ong ka samla bad ka syllud la ka sohshkor pyllun kaba heh la kat ka sati rangbah
“To ieh ngan sdang shwa ma nga. Nga dei u Hiram bad nga don tang 2 ngut shipara” u iathuh bad u peit pyrshah ia ka
“Khublei. Nga kyrteng ka Rikynti bad nga don 6 ngut shipara. Nga dei kaba san bad ba khadduh u dei u shynrang” ka iathuh.

“Khublei ia phi ruh. Ka kyrteng jong phi kaba sngewtynnad bha bad ka kit jingmut bad kumjuh ruh kaba sngewtieng” u ong bad ka wiat samrkhie.
“Sngewtieng balei ka kyrteng jong nga” kren lam leh khluit ka Ri.
“Em, kam lei lei hynrei ka dei tang ka jingsyntuid u thylliej” ong u Hiram ha ka dur leh bun jingmut
“Lada ka shu long kumta to kam lei lei hynrei peit ho ioh phi kren khnang” ong ka Ri bad ka kyrngah khlieh
“Ia noh phi lah slem eh” ong u Hiram bad u pynsiew ia ka bai bam
“To ia ngin krad noh nangne” u ong ia ka bad iaid la ka lynti
“To khublei ia phi ruh bad kynmaw ban khi noh ia kito ki tmain niuhmoh jong phi ho” kren pyndom ka Rikynti
“To phi wat nang than” u pynphai ktien bad peit da dien ia ka
Katba u dang iaid lynti sha la iing u kynmaw ba ka Ri ka riam dkhar. Kane ka la pynbitar ia u ba ki paradoh ki klet noh ia la ka tynrai. U la buh jingmut ba ha kawei ka sngi un sa kren ia ka. Ka jingiakynduh nyngkong ka dei ka jingiakynduh kaba don jingktah khamtam ia ki samla. Haba la dei ka por thiah, u Hiram u la kiew ha jingthiah. Ki khmat jong u ki shat shane shatai la kumba ba torchlight. U ring dur bad pynwan dur ha la khmat ia ka Rikynti. Ka jabieng ka suh thain ki jingmut jingpyrkhat kum ka jingkynmaw ba ka kren kumto kumto bad ki shkor kiba ioh sngewsah ia ka sur jong ka.

“Shi buh jingmut eh leh aiu sa kato ka bym iler. Ka dur ka dar ka bym da itynnad peit shwa tang ka bniat ruh kumto, peit sa ka khmut bym wan dur ei ei. Shu dei ba ka dang samla shu i plung bad ba dang leh stai. Da la tymmen lei te sa kum babe pynban. Ngan khuslai aiu sa kata lashai la shi sngi ynda nga la trei hadien ba la dep ka jingpule ngan peit da kaba kynsai. Nga shu kren bad shu sngew jan jait ba dei para khasi bad sa ha nongwei briew” u kren ha la poh mynsiem. Haba la dap 11 baje lah lah u lah iohthiah jar. [yn dang bteng]