Ka jingkhang ki iew khappud

Ki don shibun ki ishu kiba la iakren ha kine ki sngi, naduh ka ishu bhah kam bhah jam, nangta ka kam pud kam sam, ka jingkhang bad die tuh dewiong, ka Inner Line Permit (ILP), kam rep kam riang nalor kiwei pat; hynrei kaba lyngngoh, ka long ba ym ju don ba kren satia ia ka jingeh jong ki nong shong khappud bad haba shu peit, la iohi pynban, kumba kitei ki briew, kim don MLA,MDC lane MP.

Katei ka mat, ka pyn pyrkhat shibun, ba ioh lehse, ka jingkhein sting jong ki nongmihkhmat, ka long pynban, ba kitei ki nongshong khappud, ki lah lalot pisa palat, ha ka por thep vote.
Katba ka jia, hynrei ka jingkren jong U Dr WR Kharlukhi, MP Rajya Sabbha, ha katei ka dorbar bah; ka la dei ban pynkyndit shkor ia ka sorkar jylla bad kumjuh ia ka sorkar India ruh, ba ka thain khappud bad ka Bang ladesh, kam dei ka jaka kaba shrah lane kaba lyngki, hynrei, ka don shibun ka lad ka lynti, ban kyntiew ha ka ioh ka kot, ka kamai kajih bad ka long ruh kaba sngew sih ban pyrkhat, ba imat, kumba ki kham stad shibun shah, ki mynnor jongngi, ban ia kiba mynta, namar ba ki mynnor, ki dang poi sha Shilot, sha Sylhet bad sha kiba bun bynta jong ka Bang ladesh ban iadie ia thied; katba mangi pat mynta, ngi la shah khang noh ban rung, tang ha ki bri ki bsah bad ki jaka puta lajong.

U MP badonburom ka Rajya Sabbha, namar ba ula maitphang ia kane ka mat ha katei ka dorbar bah, kumta, um dei satia ban shongthait, hynrei, ula dei ban mait lynti shakhmat, ban plie wang ia ka ioh ka kot, ka khaii pateng jong katei ka thain bad ka Bangladesh lane bad kino kino ki ri jong ka pyrthei bad ka long kaba sngewsih shi katdei, ba na ka daw jong ka jing shngain jong ka Delhi, ba ki nongshong khappud, ki mad ia kum kine ki jingshah lehbein.

Kam dei tang katta, ka la dei ruh ia U MP ka Rajya Sabbha, ba un khynra noh ha kane ka kynti, ia ki skhim border area, kiba la ju iarap ia ki samla pule kiba wan na ki thain border area, ha ka kyrteng jong ki border area scholarship, kiba bei pisa, na bynta ki hostel, ban tei ia ki samla kiba wan na ki thain khappud bad sa kiwei ki kam pynroi; hynrei ha kine ki sngi, la iohi, ia kitei ki skhim, ki ia muja ki MLA bad ki BSF ban jied shiah, tang ia ki briew kiba ki mon.