Ym slem shuh, lah ban poi 1000 tyngka ka doh masi

Shillong:Haba U Rupang u pyrshang ban wad jingtip ha kaba iadei bad ka jingkiew dor ka doh masi na u nongialam ka Khasi Jaintia Butcher’s Welfare Association(KJBWA) U Bah Generous Warlangpih u la iathuh ba ka jingkiew dor ka doh masi ka dei kaba palat pud bad kaba yn ym don mano mano ruh ba lah ban len ia kane bad kumba long hi mynta ka dor jong ka doh masi ka poi 500 shi kilo kaba don shyieng bad 600 kaba ym sop shyieng iathuh u bah Generous.

Haba u Rupang u la pyrshang ban kylli ia ka daw na ka liang u bah Generous u la iathuh ba ka daw ba kongsan kumba long mynta ka dei ka jingkyrduh masi shohdoh bad ka jingjyllei ka shalan be-ain sha Bangladesh. Kumba long mynta ka jingkyrduh masi na iew thied masi ka long kaba jur bha khamtam naduh ba wanrah ka sorkar Assam ia ka ain iada Masi iathuh u Bah Generous. Nalor ba la kyrduh lupa ki masi shoh doh sa ba jur ka jingshakan be-ain sha Banglaesh uba mad jingeh nyngkong dei hi u paidbah ba bam doh ong shuh shuh u Bah Generous.
Ha kaba iadei ban ka jingai permit thied masi na ka sorkar na ka liang utei u nongialam ka seng ki nongshoh doh, u la iathuh ba kumba long mynta ym don satia uwei ruh u nongshoh doh ba ioh permit, lehse kiba ioh ruh kin dei ym ki nongshohdoh ba shisha, hynrei kiba pyndonkam ia ka permit ha kiwei pat ki rukom, u la bynrap.

Kat kum ki kyndon ha katei ka ain ki khang sbak ban die masi sha ki nongshoh doh. “Hato lada kum ki nongshoh doh ngi ioh permit ban thied masi kum ki nongshoh doh phi tharai ka sorkar Assam kan shah?” buh jingkylli u Bah Generous. Kumba long mynta hi ka sorkar kam pushe satia ban iakhun lehse ba la kumno kumno ka sorkar Assam kan ym pynthud iaka jingpoi ki masi sha ka jylla hynrei kumba long mynta na ka liang ka sorkar kam i pyrwa eiei ia kane kren bynniaw u nongialam kin nongshoh doh.
“Kumba long mynta ki masi shoh doh kiba ngi thied ngi la long kumba thied black beit naduh ba wan ka ain iada masi bad wei haba la jia kumta phi sngewthuh hi ka dor kaba ngi hap thied ka long kaba rem shibun” ong u Bah Generous. Lehse lada kane kan bteng kumba long mynta ym slem shuh ba ka dor ka doh masi kan poi 1000 tyngka, u la bynrap shuh shuh.

Ka jingbym lah ka jylla ban pyndap doh, ka dei beit ka jingshaniah tylli na ki jylla ba na bar ban pynpoi masi bad lehse lada ka sorkar ka pynshlur ia ki nongrep ban ri masi shoh don lyngba ki skhim bad ki subsidy, yn ioh masi shohdoh tang na jylla lajong lehse ka doh masi, yn ioh thied biang ha ka dor kaba bit, kren sngewskhem utei u nongialam ka seng ki nongshoh doh.
Kumba long mynta ha ka jylla ym don satia uwei ruh uba ri masi na bynta ban shohdoh, hynrei tang ka masi khem dud bad ka masi iadur ne masi reng ong u Bah Generous, bad ki masi ba thied na kiba ha ka jylla kin dei tang ki masi ba ym lah pynmih dud shuh ne ki masi iadur ba la noh ka rta ne kiba ym don bor iadur bad katno tylli eh yn ioh na ka jylla ban shoh doh, la bynrap shuh shuh u Bah Generous.