Kyllon iap 2 ki khynnah, ba ia siat ka NSCN(K) bad ki shipai

Kohima, 17 Naitung:
2 ngut ki khynnah skul ki la kynnon iap hapdeng surok, ha ka por ba ka NSCN(K) ka dang ia ther kuli bad ki shipai ka Assam Riffle. Katei ka jingjia ka la jia ha ka shnong Phor ha Phek District ka Nagaland.
Katei ka jingjia ka la mih ha ka por ba ki shipai Asam Riffle ki dang iaid lynti ha surok da ka kali jong ki, kaba la kit ia ka metiap jong ki 2 ngut ki dkhot ka NSCN(K) kiba la shah siat iap ha ki shipai ha ka miet 16 tarik, hynrei ha katei ka por ki paidbah katei ka shnong ki la mih sha surok bad kim ailad ia ki shipai ba kin iaid shakhmat ha kaba ki la dawa ba ki dei ban pynphai ia kitei ki metiap sha ki namarba kitei ki 2 ngut ki dei na katei ka shnong.
Katba ka jingiathalain nia ka dang iaid hapdeng ki paidbah bad ki shipai la ong ba kynsan kynsan ki dkhot ka NSCN(K) kiba la ap thap lypa ki la ther kuli sha ki shipai bad ha katei ka jingjia ki kuli ki dei ia kitei ki 2 ngut ki khynnah skul bad ki la kyllon iap hashen. Kiwei pat kiba la ngat kuli bad kiba la mynsaw jur ha katei ka jingjia ki kynthup ia kawei ka longkmie na katei ka shnong, uwei u ophisar ka Assam Riffle, uwei u shipai langrut bad la pynkit mar mar ia kitei sha ki jaka sumar. La ong ba ka kynhun ki shipai ba la ialam da u Director General of Police L L Doungel ki la leit sha katei ka thain ban tem ia ka jingiakynad hapdeng ki shipai bad u paidbah.