Wanphai biang U Ma Nehlang sha ka politiks

U Ma Nehlang Lyngdoh, U MLA barim jong ka Rymbai, un wan phai biang sha ka kam sain pyrthei, da kaba ula pyniasoh ialade bad ka seng NPP bad utei u rangbah, un iakhun ia ka elekshon na Khliehriat Constituency, kaba dei hi kajuh ka Constituency, kaba u ju long mynshwa, kum U MLA.

Ha ka jing wan phai jongu sha ka politiks, U Ma Nehlang, u kam, ba ka Constituency jongu, ka sahdien shibun eh ha kine ki sngi, ha ka jinglong nongmihkhmat jong U Ma Kyrmen Shylla, uba la ialeh Class XII, la laisien kynthih (kumba ula iathuh hi, ha ki jing ialang paidbah) bad kumta, ka la pynshisha ba ha ka politiks, kam ju don ka jingkut nia, lane ka jing kynnoh lane ka jingkiew ha ka roi ka par, hynrei, ha uba peit u shu iohi, ia ka jingsahdien, katba ha uba trei, ula sngewthait hi iar.

U Ma Nehlang, u dang pule Class 5 (lada shim na ki kot, kiba la pyni sha ka elekshon commission) bad la ju iathuh khana biria (lehse), ba utei u rangbah, u kwah ban long MLA (kham mynshwa), namar ba u kwah ding sohsaw bad ha ki por, ba u long MLA kham mynshwa, utei u rangbah, um ju kren ruh ha iing dorbar jylla, hynrei ha u snem 2008, ha ka jingdon spah kaba kumba T.5klur antad, ula long uwei na ki nong khaii, uba paw ha Jaintia Hills.
U Ma Nehlang, u wan nyngkong sha ka politiks, lyngba ka tiket na ka seng Congress bad ym dei tang utei u rangbah, hynrei, U Ma Ngaitlang Dhar ruh, sa uwei na ki heh spah, u wan rung sha ka politiks, na ka seng Congress.

Ka NPP, kaba dei ka seng, kaba don ha ka sorkar, ha kine ki sngi, ka la jied ia U Ma Nehlang, ba un iakhun ia ka elekshon na Khliehriat Constituency bad katei ka la paw shai, ba ka jingkren shaphang u bieit ne u stad lane u dap klur dap milion, ha ka politiks, ka la dei ban kut noh, naduh mynta; namar ba kam don, kawei ruh ka seng sain pyrthei, kaba bat ia kitei ki kyndon; lada dei ka seng Congress (kaba khlain bor ha ki por mynshwa) lane ka seng NPP, kaba khlain bor ha kine ki sngi.
Ngin dang ia peit, ia ka rai u paidlang ka Khliehriat bad lada U Ma Nehlang, un jop biang, ka la long kum ka khana u aesop, kaba ong “riew pynban kek du”.