Dheng kali na ka mareh thong Cherrapunjee

Shillong, 17 Naitung:
Ki paidbah ka thain Sohra ki la sat sia ia ka jingdheng kali kaba jur bha ha ki surok Sohra-Shillong bad la kynnoh ba katei ka jingdheng kali ka la mih na ka daw ka jingbym biang ka rukom pyniaid ha ka jingiamareh thong kaba la tip kum ‘Cherra Punjee Marathon’.
Bunbah ki paidbah katei ka thain ki la phone sha u nongthohkhubor, ban pyntip ba ka don ka jingdheng kali ha ka surok Sohra, namar ka jingpynia mareh thong. Ki la don ki nongniah kali Sumo ki paidbah ba shong kali kiba la phone sha u nongthoh khubor mynta ka sngi ha kaba ki la kren da ka jingdom ban pyntip ia katei ka dheng kali.
Kiba bun ki nongniah kali ki la pyntip ba tang na katei ka jingiamareh Marathon ki la duhnong bha, ha kaba ka kamai ba ki ju ioh manla ka sngi ka la duna noh, naba ha ka jaka ba kin iaid ar sien ki hap ban iaid noh tang shisien. Ki paidbah nongleit nongwan ruh ki la pyntip ba ki kiew khnang na Sohra sha Shillong ban leit thied jingthied naba ka dei ka sngi shuti, hynrei ka por jong ki ka la shu mietkai noh tang ha surok.