Ngin sa ia peit, ia ki affidavit elekshon ki MLA ba mynta

Haba peit ha kine ki sngi, ki nongialam jong ka sorkar MDA, ki saitkhuid ialade, halor ka bamsap bampong bad la iohi ha ki khyndiat sngi ba ladep, ba u symbud myntri rangbah, u pyndonkam ia ki kyntien ba ki shah kynnoh kum ki nongtuh, nonglute, ki nongkloh pla bad kumta ter ter.

Hynrei katei kam don jingpher eiei ruh em bad ki paidbah nongjied, ki dei ban long pat kiba stad bad kawei na kita, ka long ba kin pyniapher ialade da kaba ki khein ia ka ioh ka kot jongki, ha ki san snem ba ladep bad ki da buh jingkhein thik thik, ia ka jinghiar ka kamai kajih bad ka jingioh jing iarap jongki na ka sorkar bad nangta, ba kin peit ruh ha ka sngi thep kyrteng jong U MLA jongki, la ma u bad ka tnga ne ki khun jongu, ki nang riew spah ne ki nangduk bad lada ki riewspah, katno ka kiew ka spah jongki, ha kine ki san snem ba ladep bad ia kata, lah ban iohi shynna, lyngba ka affidavit, ba U MLA, un ai sha ka election commission bad lada U MLA, u nang riew spah bad u nangthied ia ki iing ki sem, ki jaka puta, ki kali kiba remdor, katba mangi ki nongjied, ngi nang duk, tang hangta ka jingshisha, ka la paw shynna, ba ka jingkamai jongu ka heh shibun, wat lada dei kum ha kane ka apot jong ka khlam corona virus.

Lada ka long kumta, ka shonghok ha ki nongjied ba kin throh pisa, namar ka pyni, ba u ne ka nongmihkhmat jongki, ki la kamai tuh bad kamai bym hok, namar ba ka spah jongki, ka nang kiew (wat ha kane ka por jong ka kiewdor ki mar ki mata) lane ba ki la kamai pynban ialade, ha ka jaka, ba kin kamai ia ka bha ka miat jong ki nongjied jongki.

Namar ba ka elekshon, kam slem shuh bad ba ki nong mihkhmat kin sa wan wad biang ia u paidbah, kumta, ka la dei hi ia ngi, ba ngin nym ia pynleit jingmut eh ia kita ki ishu jong ka kam parti, lane ba kane ka parti, ka kham bha ban ia katai nangta, ba kane ka dei ka parti tit bad katai, ka dei ka parti heh bad kum kine ki ishu, kim iahap ban dang iakren; hynrei dei ban bud noh ia ki kam jong ka seng TMC bad ka AAP (nalor ka BJP), ha kaba ka jing kongsan, ka long ia ki jing donkam jong u briew shimet; namar ba ki parti hi kim ju neh sah bad katei ka paw shai, ba wat ka seng Congress, ka don ha ka khep ba ka hap khylliap lama ialade.