Leit ialap elekshon u heh ka AICC ha Mairang

Shillong, 16 Naitung: 
U heh ka AICC u V. Narayanasamy u la hiar sha Mairang ka West Khasi Hills ha ka 15 tarik Naitung ban ialap elek shon lypa watla ka dang jngai ban long ha kane ka jylla.
Kane ka jingleit u heh ka AICC ka long lehse hadien ba ka party ka sngew synjor bad kyiuh bha hadien ba ki myntri ka sorkar BJP ki ju wan khah khah sha kane ka jylla wat shaduh ki jaka  nongkyndong ruh ban jngoh ia ka roi ka par.
U V. Narayanasamy u la hiar sha Mairang ban iadon bynta ha ka jingialang bah jong ka Congress katei ka district bad ha kane ka jingialang u la ialap elekshon ia ki paidbah ka West Khasi Hills bad shi bynta ruh ban pynkhlain ia ka seng Congress hapoh West Khasi Hills kaba don 5 tylli ki konstitwensi kynthup ka Rambrai Jyrngam, Mawshynrut, Maw thadraishan, Nongstoin bad Mairang Constituency kiba mynta ka kynti kim don ia ki nongmihkhmat na ka seng Congress. La pynlong ia ka jingialang bah ha  Tirot Sing Dorbar Hall, Pyndengumiong, Mairang.
Ha kane ka sngi la iadon ryngkatlang ka Dr Vijay Laxmi Secretary AICC ba peit iaka Meghalaya, u MP ka Shillong Seat Ma Vincent Pala, u President ka MPCC u Dr DD Lapang, ki MLA ki MDC bad kiwei kiwei. Haba kren ha ka jingialang kaba la long ha Mairang, u Narayanasamy ula kam ba ka West Khasi Hills kala ioh shibun ki kam pynroi ha ka por ba synshar ka seng Congress, kynthup iaki ophis bad khamtam eh iaka Surok kaba na Shillong bad iaid lyngba ka West Khasi Hill ka ban mih sha Tura, nalor kiwei kiwei.
U la kynthoh ba bun ki skhim sorkar kila sahteng lut mynta hadien ba ka synshar ka sorkar BJP, nalor kane ula ong ba u Myntri Rangbah duh ka ri u Narendra Modi u shu kular kai iaki paidbah bad pynbieij da kumne da kumtai.
Ha kane ka sngi la ioh ruh ka jingkren na kiba bun ki nongialam ka seng Congress. kiba kynthup ia U Ma Vincent Pala, MP, Dr. D.D. Lapang, President MPCC,  kong Roshan Warjri, Bah Rowell Lyngdoh, Bah HDR Lyngdoh, bad kiwei kiwei.
Ki la kyntu ia ki dkhot ka Congress ha WKH ba kin long kiba trei shirhem bad trei shitom na ka bynta ki paitbah lyngba ka party Congress ban pynjop donburom ha ki Elekshon.
La pyniaid ia ka jingialang da ka Dr. Eureka L Mawlong, President WKHDCC. Hadien katei kiheh sorkar ki la leit peit bad khmih ruh ia ka CHC Mairang Hospital bad ki lah kular ruh ban leh ei ei na ka bynta ka jaka ai jingsumar ha ka thain Mairang na ka bynta ka jingdonkam ki paitbah.