Pyrkhing jubor, ka jingshalan masi sha ka jylla

Ka jingshalan masi, ka la khang sbak ha kine ki sngi (lyngba ka Assam) bad ki la don bun bah ki trok, kiba shah kem bad shah kurup noh; da kaba la ai daw, ba ki kit ia ki masi, kiba khlem ki kot ki sla kiba biang bad haba kdew ia ki kot ki sla kiba biang, ka mut ba ki dei tang ia ki masi, kiba mut ban ri lane ban pynkha khun bad kim dei satia ban bam doh, namar ba ka sorkar India, ka la khang pyrshah ban bam doh masi.

Ka ain jong ka sorkar Assam, ka la biang bha, ban khanglad ia ki jylla shatei lam mihngi, ba kin nym bam doh masi shuh, namar ba ki kyndon, kiba la buh ha ka ain, ki long ki bym lah satia ban pyntreikam da ki nongshalan masi bad kawei na kitei, ka long ia ki shalan lane ki kot ki sla, kiba pyni, ia ka jingthied bad ka jingdie masi, ha kaba la pyni pynban, kumba kitei ki mar, ki don ha ki dukan heh aiu re, ba yn lah ban pynbiang ia ki bill, ki cash memo bad kiwei ki kyndon jong ka ain.

Ki nongdie doh masi, ha Iewduh, ki lynniar ha kine ki sngi bad ki la nang kyntiew ia ka dor jong ka doh, na kawei ka por sha kawei pat, hynrei katei ka jing pyrshang ruh, kan nym shan slem satia, namar ba ka ain ka Assam, ka thew beit hi, ban pynduh jait syndon ia ka jingbam doh masi jong ki Khasi, Jaintia (hynrei ngi hap ban sngewthuh pat, ba katei ka ain, kam lah satia ban khang ia ka jingshalan masi sha Bang ladesh, namar ba ka Bangladesh, kam dei ba ka don tang hajan ka Assam ne ka Meghalaya).

Ka sorkar Meghalaya, ka la thawlad ban pyniaid beit ia ka jingshalan masi, kaba wan na Bihar, West Bengal, UP; hynrei katei kan nym trei kam satia, namar ba ka sorkar BJP ha Assam, kan nym khein snep satia ia ka jingdonkam ki nongbam doh ha ka jylla Meghalaya bad mynta, ka don tang kawei ka lad bad kata, ka long ban ia sangeh bam doh masi noh lane ban ia ri masi hi bad ia bam doh, na kitei ki masi lajong bad lada jia ba ngi khmih lynti, tang na ki jingri kiba nabar, kan sa poi ka por, ba ngin nym ioh eiei shuh ha ki por ki ban sa wan.
Ka Assam, ka la iai bteng ban pynbor ia ka Meghalaya, ha kiba bun ki bynta bad lada ngim shemphang ban pynkhreh ialade, ngin shem jingeh shibun, ban ioh ia u khaw, ka doh bad ia kiwei ki marbam ba kongsan.