Kam ka Ukraine, ba ka ioh siat iap, sa uwei na ki heh duh shipai ka Russia

Kyiv: Ka thma jong ka Russia sha Ukraine, ka la poi sha ka 21 sngi haduh mynta ka sngi bad mynta ka sngi, ka Ukraine, ka kam ba ka lah ioh pyniap sa ia uwei u heh shipai jong ka Russian. Ka Ukraine, ka kam ba ka la ioh ban siat iap ia U Major General Oleg Mityaev, uba dei u Commander ka 150 Motorised Rifle Division. Da ka jingshah siat iap U Mityaev, kumta ka Ukraine, ka la ioh ban pyniap ia 4ngut ki heh shipai kiba ha khlieh duh jong ka Russia, naduh ba ka Russia, ka hiar thma ia ka Ukraine, ha ka 24tarik Rymphang.

Kawei pat ka khubor jong ka CNN, ka iathuh ba ki shipai jong ka Ukraine, ki la siat pynhap ia bun tylli ki helicopter jong ka Russia, kiba her ha sawdong jong ka Kherson International Airport. La iathuh ba ki don 3 tylli ki helicopter, kiba la jot thiaw kiba don ha katei ka kad liengsuin.

Ha kawei pat ka khubor, ka United Nations High Commissioner for Refugees, ka kam ba ki don haduh 3 million ngut ki briew, kiba la phet krad ialade na Ukraine, naduh ba ka sdang kane ka thma.