Ngi la kynthup lang ïa u kwai hapoh ka Bill ka rep ka riang, ong u myntri

Shillong:”Wat la ïa ka sboh Urea la pynsangeh ai naduh u snem 2014 sha ki nongrep, hynrei ka tnat rep naduh u 2018 ngi la ïakren ban wanrah biang ïa katei ka sboh ba la pynduna dor da ka sorkar ban wanrah ka jingsngew sting ïa ki nongrep bad nga kyrmen baroh 60 ngut ki MLA kin kyrshan ïa ka Sorkar ban sdang pynduna dor ïa ka sboh Urea,” ong u Myntri ka tnat Rep u Bah Banteidor Lyng doh hapoh Ïing Dorbar Thawaiñ Mang tyngka.

Ïa katei u la jubab ïa ka Zero Hour Notice ba la wanrah da u MLA ka Mawsynram Bah Himalaya Shang pliang halor ka jing ong ki nongrep ba la leh kyllut pura ka sorkar ïa ki jingjynjar ki nongrep.
U Myntri u la ong ba katkum ki kyndon ka NDRF, SDRF 2015 ka don ka lad jingïarap sha ki jingduh ki nongrep. U ong ba ka don ka jingjurip jingjulor da ki ADO, ka mang tyngka la leh hapoh ki block, ïa ka kaiphod la aiti sha ki bor pynïaid distrik.

“Ha u snem 2020-21 ka jingjulor ka long haduh 12 hajar hectare ka jaka bad kumba 28, 222 ngut ki nongrep ki shah ktah bad kumba T. 15 klur ka mang tyngka la aiti sha ka sorkar Pdeng. Ha u 2021-22 ka jingjulor ki jingthung haduh Naiwieng katkum ka jingheh ka jaka kumba 156. 986 hectare bad ka pisa ba la ai sha ki jingshah ktah ka long T. 34,13 lak. Ha ki snem ba la leitnoh ka sorkar jylla ka mang T. 6.07 klur ban ïarap ïa ki nongrep ba julor ki jingthung jingtep bad ïa kane la leh katkum ka jingjurip ka National Statistics Office ne NSO,” ong u Myntri.
U la ong ba ka sorkar jylla ka khlem leh kyllut ïa ki nongrep hynrei kumba 100% ka jingkyrshan ka leit sha ki nongrep.
Haba pynshai ba u kwai ne Arecanut u hab hapoh ka kyrdan pynïasynriem kum u drok, u Myntri u la ong ba kam dei ka jingong jong u, ne ka Sorkar jylla.

“Ngi dei ka jaitbynriew ba bam kwai bha kumta la kynthup lang noh ïa u hapoh ka Agricultural Live Stock Ammendment Bill bad halor ka Minimum Support price ne ka jingbuh dor ka Sorkar ïa ki marrep ngin ïa khmih bniah da ka jingïakynduh lang bad ki ophisar ka tnat namar don katto katne ki jingthung khlem kynthup da ka Sorkar Pdeng,” ong u Bah Banteidor.