T.400 lak, khur ki snar thok Facebook,na ki ‘thei NE rKatno ngut ki ‘thei Shillong ba la shah thok?

Shillong, 15 Naitung:
Na ka por sha ka por ki la tuid ki jingujor sha ki thanad pulit ka nongbah Shillong ba ki thei samla kane ka jylla ki la shah thok da ki phew lak tyngka ha ki paralok ba ki ia ieit ia thoin ha Face book , ha kaba kitei ki paralok FB jong ki, ki ju kular ban pynpoi ia ki jingai sngewbha kiba rem dor sha ki, hynrei ki hap ban thep pisa pat ban ioh ia kitei ki tiar. Bunbah ki kynthei na kane ka jylla ki la ngop bad ki la thep shi thep pisa, hynrei ha kaba khadduh ki ju pei shkor pat hadien ba ki la shah thok.
Ki pulit ka nongbah Delhi mynta ka sngi ki la ioh ban kem ia kitei ki briew kiba na bar ri kiba ju mlien ban leh ia kitei ki kam thok khamtam ia ki kynthei ka thain shatei Lam mihngi, ki la don haduh 5 ngut kiba la shah kem mynta ka sngi bad baroh 5 ngut kitei ki dei na ka ri Nigeria. Kitei ki ju mlien ban buh da ki dur ki ban khring ia ki thei samla bad ki ju pyni ruh ha ki dur ia ka jingai sngewbha ba ki la pha sha ki bad hadien kata ki ju phone da ka mobile ia kito ki briew kiba ki thok bad ki bthah ba kin thep pisa.
La iathuh ba tang na ki thei samla ka thain shatei Lam Mihngi, kitei ki 5 ngut ki la ioh khung haduh T.400 lak tyngka tang ha ka shisnem. Kaba kham sngew phylla shuh shu kaba ki pulit ki lap ka dei napdeng kitei ki 5 ngut ki don ruh kiba dei ki lok jong ki ophisar kiba heh bha kum u lok jong ka doctor, u lok ka ophisar sorkar, u lok ka nonghikai, u lok ka nongkhaii , u lok ka Nurse bad don ruh u lok ka Air Hostess.