Ka Russia, kam don tiar thma shuh, ka pan jingiarap na ka China, ong ka US

Moscow: Ha ka jingialeh thma jongka, kaba la lai taiew pyrshah ia ka Ukraine, ka Russia, ka la duna tiar thma, ong ka khubor na ki heh sorkar jong ka America. Tangba ki heh sorkar ka US, kim shym la ioh jingtip, la ka China ka mynjur ne em, lane ka la ai ne em ia kitei ki tiar siat, kiba ka Russia ka pan.

Katei ka jing iakren jong ka Russia bad ka China, ka la pynlong ia ki ri sepngi, ba kin husiar bha bad sngew khia shi katdei, namar ba ki shim, ba ka China, kan lah ban pynbiang ia kitei ki tiar ialeh thma, kiba ka Russia ka donkam bad katei kan nang plie lad ia ka jingialeh thma, kaba nang jur ha Ukraine bad kaba lah ban nang pur sha kiwei de ki ri sepngi.

Kawei pat ka khubor, ka iathuh ba U Jake Sullivan, uba dei u National Security adivsor jong ka US, un leit sha Rome mynta ka sngi, ban iakynduh bad U Yang Jiechi, u heh duh jong ka sorkar China, ban iakren halor katei ka mat. Na ka liang U Sullivan, ula maham tyngeh ia ka China, ba kam bit ban iarap ia ka Russia, namar lada kan leh kumta, kan mad ia ka jingsaja kaba jur, ha kaba ki ri sepngi, kin sangeh lut ia ka jing iatrei kam ne ka khaii pateng jongki bad ka China, kumba ki la leh ia ka Russia bad katei kan pyntroin shi katdei ia ka kamai kajih bad ka ioh ka kot jong katei ka Ri, kumba ka jia ha kine ki sngi ia ka Russia.