Dang sar ka BJP, leh kyndit sa ka AAP

Ka elekshon sha ki 5 tylli ki jylla, ka la kdew shai, ba ka BJP, ka dang dei ka seng sain pyrthei, kaba u paidlang ka Ri, u dang ieid bad sngewjan, wat la ki la don shibun ki jingshah kynnoh ne ki jingshah kynthah kiba har rukom.

Katei ka seng, ka dei hok, ban nang kiew bad nang khlain bor, namar ba ka don ia ki nongialam ba satar bad kiba la bam ha ka politiks bad lah ban ong, ba ka shlem jong ka RSS, ka la suhthied jylliew, ban sei ia ki nongialam bapher jong ka BJP bad kiba la lah ban kit ia ka lyngkor kum ki myntri rangbah duh bad sa shibun kiwei de ki snar sain pyrthei bad kane ka dei kawei ka jingkhang kaba ailad ia kito kiba kwah ban rung sha ka sain pyrthei, ba kin da sngewthuh ia ka jingmut ba shisha jongka (ha kaba wat ka seng Congress ruh, kam pat ju pyndonkam ia kitei ki iktiar ban triem ha ka politiks).

Lait na ka BJP, kaba pyn kyndit ia kiba bun, ka long sa ka bor jong u synsar lane jong ka seng AAP, ha kaba ka ioh ban sar jem ia ka elekshon ha Punjab, ha kaba u nongialam, uba ioh jing kyrshan da ki sms, un long u myntri rangbah ba thymmai ka jylla.
Lyngba kitei ki jingshisha haneng, ka la paw shai, ba ka elekshon MP 2024, kam dei satia, kaba suk ban khein jem ia ka seng BJP bad ha kajuh ka por, ka thew pynban ruh, ba ka jing ialeh kam dei shuh bad ka Congress; hynrei bad ki seng trai ri pynban bad kitei kin kynthup ia ka NCP, kaba dei ka seng kaba satar jong ka Maharashtra, ka DMK, ka TMC, ka Shiv Sena bad sa shibun kiwei ki seng trai ri, kiba lah ban shu pyn kyndit pynban ha ka jing iakhun ia U Goliath ha u 2024.

Ka Congress, te ka la nang hiar shi katdei bad kaba ima, ka long ba katei ka seng, kan lah ban duh ban dam noh ia ka jing long seng heh jong ka India, ha kaba kan sa kylla long noh kum kawei na ki seng trai ri, katba kiwei ki seng trai ri, kin nang kiew stet shajrong kum ka Trinamool Congress (TMC), kum ka Aam Aadmi Party (AAP) bad kitei kin sa nang shim noh ia shibun bah ki ktem jong ka seng Congress bad kin mih bujli, ia u paidlang ka Ri India.
Ka Sonia, U Rahul bad ka Priyanka, ki la dei ban nym iaid shuh shikmie shikhun shipara ia katei ka kam bad ki la dei ban wad ialade da kiwei pat ki kam bad ailad ia kiwei ba kin pynkhie im ia katei ka seng tymmen.