Ka National Games kan nym phet shano shano ruh, ong u myntri Jylla

Shillong:U Myntri ka tnat ki kam ialehkai ka sorkar jylla u Bah Banteidor Lyngdoh, haba jubab ia ki jingkylli ba la kylli hapoh ka iingdorbar ha ki kynta kylli jingkylli bad haba haba jubab ia ka jingkylli bynrap ba la wanrah da u Zenith Sangma mynta ka sngi u la iathuh ba ka sorkar jylla kan pyntreikam noh shen ia ka Sport Policy ha kine ki laibnai ban wan, ia ka Sport Policy jong ka jylla la pynmih ha ka 12tarik u Nohprah jong u snem 2019.

Haba jubab ia ka jingkylli ba la wanrah da u MLA ka Mawphlang u Bah Eugeneson Lyngdoh u myntri u la iathuh ruh ba ka jingpynmih ia ki mat pyntreikam jong Sport Policy ka la iaid shait shait hadien ba ka la sahkut noh, na ka daw ka jingwan lynshop ka khlam Covid ia ka jylla, ha kine ki ar snem ba la dep.

Shuh shuh u MLA na Mawphlang u la kylli shuh shuh ia ki jingpynkhreh jong ka sorkar ban pdiang ia ka National Game la ka sorkar ka iarap ne em ia ki kynhun ialehkai kiba don ha ka jylla bad la ka ju iarap bad kyrshan bai skul ne thungkam ia ki nongialehkai na ka bhah ki kam ialehkai ia ki nongialehkai kiba wanrah takma ia ka jylla ha ki rynsan ialehkai ha ka kyrdan National, Regional bad International level bad haduh katno ka sorkar ka bhah kyrpang ia ki.

U myntri u la jubab ba na ka liang ka sorkar ka la ai jingiarap da ka song pisa ia ki Sport Association bapher bapher ha ka jylla bad u la iathuh ruh ba ka sorkar ka la mang 1.25 klur ban kyrshan baiskul ia ki 264 ngut ki samla ialehkai kiba la wanrah takma sha ka jylla bad u myntri u la iathuh ba un sa pan jingtip na ka MPSA ha kane ka bynta

Haba pan jingshai shuh shuh na u Myntri u Bah Eugeneson u la kylli la ka sorkar ka la pynkhreh ne em ki nonghikai ba la pyntbit ban ai ia ki ranglehkai ka jylla ka jinghikai bapaka ha shuwa ba kin ia aireng ia ki jingialehkai bapher ha ka National Games bad la ka sorkar kan ai ne em ia ki jaka ialehkai kiba ka tei na bynta ban ioh pynlong ia ka National Games sha ki Sport Association hadien ba ka la kut kane ka lumpung bad haba jubab na ka liang u myntri u la pyntip ba ka sorkar ka dang peitbniah ia ki kyrteng jong ki nonghikai kiba ki Sport Association ki phah sha ka sorkar bad ruh u la iathuh ka sorkar kan sa rai la ka sorkar kan ai ne em ha ki Sport Association ia ki jaka ialehkai.