9tylli ki kuli ba dang im ha baranda ka skul Government, Jowai Dei ki kuli China, suba ba leit buh ki briew ka HNLC

Jowai, 8 Risaw:
Mynta ka sngi, u chowkidar jong ka skul Government Boys Higher Secondary, Jowai, ula kyndit thret, ha kaba ula lap dang step phyrngab ia ki kuli kiba la buh ha ka ben, kaba don ha baranda jong katei ka skul, ha khmat jingkhang jong ka Principal jong katei ka School.
Ha kitei ki kuli, ba la lap ha ka por 6.30 mynstep, ki kynthup ia uwei u kuli 7.62mm SLR. Nangta ki don sa 8 tylli kiwei pat kiba thoh “Hyniewtrep ka ri um snam u kñ u kong”, nangta sa uwei pat uba ong “U Mukul u dei u thlen un nguid iaki khasi” bad uwei pat u kuli, uba thoh “This bullet belong 2 ur Head Mukul Begum,be Careful” bad nangta sa uwei pat uba ong “7 trep HNLC (JK) 7skum HNLC(KJ)” bad uwei pat uba ong “We want ILP??? ILP!ILP!ILP!” bad don sa uwei pat uba ong “Phi ki pulit Khasi, sumar ia ki khun ki kti” nalor kiwei kiwei. Nangta ka don sa kawei ka jingthoh ha ka kynroh, kaba dawa ILP, kaba don hajan jong kitei ki kuli.
La iathuh da ki pulit, ba kitei ki dei ki kuli kiba dang im suda bad ki pulit, ki ong ba ki dei pat ki kuli kiba la rim, ha kaba la iathuh ba kitei ki phra tylli, ki dei ki kuli kiba lah ban shna ha China, namar ba ym don satia ia ka suloi aiu aiu ruh, kaba pyndonkam ia kitei ki jait kuli.
Ym lah ban tip haduh mynta, la katei ka dei ka jingthoh kaba la buh da ki seng dawa ILP ne kaba la buh da ki seng kaikhlaw, kum ka HNLC ne kiwei pat ki kynhun.