Thaw histori ha Meghalaya, iatrei lang ka Congress bad ka BJP, lyngba ka NPP

Shillong: Ka la mih ka jingjia, ka bym pat ju jia ha ka khana sain pyrthei bad kata ka long ba ka seng Congress, kan ia treilang bad ka Meghalaya Democratic Alliance (MDA), kaba dei ka kynhun, ba ka iatreilang ka seng BJP.

Mynta ka sngi, ka Congress Legislature Party (CLP), ka la phah da ka shithi sha U Conrad K Sangma, myntri rangbah ka jylla, ha kaba la soi da baroh 5ngut ki MLA, ba kynthup ia ka kong Ampareen Lyngdoh, Bah Mayralborn Syiem, Bah Mohendro Rapsang, bah Kimfa Marbaniang bad Bah PT Sawkmie. Ha katei ka shithi, ki pyntip, ba ki la pyn iasoh ialade bad ka kynhun jong ka MDA, na ka bynta ban nang pynkhlain ia ki kam jong ka sorkar jylla.

Hadien ka jing ia kynduh ia u myntri rangbah ka jylla, ka kong Ampareen, ka iathuh ba ki la iakren halor ka jing ia kajia kam pud ka Assam bad ka Meghalaya bad ka da kren shai, ba mynta, ki la iatreilang haduh 110 percent bad ka sorkar MDA bad ka da kyrpad ia ki paidbah, ba kin pdiang ia katei ka rai jongki, ba ki kyrshan ia ka sorkar MDA.