99.9 percent, ngan long CEM biang manga:Madon Rymbai Kob ka Congress, ban synshar biang ha KHADC & JHADC

Shillong,4 Rymphang:
U Chief Executive Member, ba mynta ka JHADC, u Madon Rymbai, u la kob ba ka Congress kan ioh ia ka bor synshar kaba marwei ha kane ka kynti ha JHADC.
Haba ia kren bad u Rupang u Madon Rymbai, u la ong ba haduh 18 ngut ki dei ki kyrtong kiba la thikna ban ioh ia ka jingjop ha kane ka elekshon MDC 2014 kynthup ia u. ’18 ngut ngin jop suk’ ong u CEM ka JHADC uba long ruh u MDC ka Khliehtyrshi.
Haba la kylli hato lada ka Congress kan jop, mano ban bat ia ka shuki CEM, “99.9% te la thikna ba ngan bat hi nga-ia ka .1% te ngam tip shuh” jubab u Madon. U Madon, u hap ban ia khun pyrshah ia ki ar ngut ki kyrtong kata uwei u kyrtong ka UDP bad uwei pat u kyrtong ka HSPDP.
Haba phai sha ka KHADC, u Bah HDR Lyngdoh u myntri sorkar uba long ruh ha ka juh ka por u MDC bad uba dep peit ia ka District Council Affairs u la ong ba ha kane ka kynti ka seng Congress ka don ka jingkyrmen ba khlain ban ioh ia ka jingbun paid ha ka ing, bad kan wan hi ha ka bor synshar. Haba phai sha ka liang u CEM , la yn pynneh ia u Bah PN Syiem ne yn jied da uwei pat, u Bah Lyngdoh u la ong ba ka shong ha ka rai ki MDC ki ban sa shah jied hadien ba la dep ka elekshon.