980 tang ha Iewduh, 6275 tylli ki dukan bar jylla, ba peit ka KHADC

Shillong,29 Jymmang:
41 tylli ki dukan bar jylla ha Iewduh ki la shah khang duh khang dam noh mynta ka sngi , hadien ba ka KHADC ka la lap ba kitei ki dukan kim don ia ka Trading License bad ruh kim pynthymmai shuh ia kaba la kut por.
Haba ia kren bad u EM Incharge ka Trade, u bah Latiplang Kharkongor mynta ka nohphai sngi halor ka jingleit khynra Trading License ka KHADC, u EM u la iathuh ba ha Iewduh, ki don haduh 980 tylli ki dukan bar jylla, na kitei la lap ba 41 tylli kim don License, kynthup ia ki bym wan pynthymmai shuh. U EM u la ong ba kitei ki 41 tylli ki dukan kim patiaw wat hadien ba la ai jingtip ia ki ban pynbiang noh ia ki License bad ban wan pynthymmai noh, kumta ka KHADC mynta ka sngi ka la shim da ka sien jam kaba tyngeh, ka bym pat ju shim ha kine ki 20 snem ba la leit, “Kane ka dei ka sien kaba nyngkong hadien 20 snem ba ngin shim ia kane ka sien jam kaba nyngkong eh” ong u bah Latiplang Kharkongor haba kren sha ki nongthohkhubor ha kamra treikam jong u.
U EM u la ong ruh ba nalor kitei ki 41 tylli ki dukan , ka tnad kan peit bniah ruh ia kiwei pat ki dukan ioh ki dang don kiba dang lait, u la iathuh ba kitei baroh 41 tylli ki ba la shah khang mynta ka sngi, yn khang duh khang dam noh, “Wei la khang-la khang, ym ai shuh” ong u bah Kharkongor uba la iathuh ruh ba ia ki tiar ki tar jong ki trai dukan lah ban pyllait tang lada wan bah jamin ki trai dukan ( ki trai ba ai wai ha ki bar jylla).
“Kane ka dei ka phase kaba nyngkong, ki dang don bun ki phase ba ngin leh” ong biang u bah Latiplang Kharkongor uba la pyntip ba ki la don haduh 6275 tylli ki dukan ha kylleng ki iew ki hat kiba hap hapoh ka jingpeit ka KHADC, u la ong ba shen na ka liang ka tnad kan hiar sha kitei ki jaka ban leh kumjuh kumba la leh mynta ka sngi. U la bynrap ba la sdang ia katei ka kam na Iewduh namarba ka Iewduh ka dei ka iew pdeng bad ka dei ruh ka pliang ja jong ki Khasi.
Haba kren shaphang ka rukom ai laisen khaii, u bah Latiplang u la ong ba nangne shakhmat ka KHADC kan ym pdiang shuh tang ia ki NOC ba ai u Syiem lane ki Rangbah Shnong, hynrei donkam ban pyni ia ka NOC na ki trai jaka ne ki trai dukan. U la iathuh ruh ba na ka liang ka KHADC, ka la kyntu ia u Syiem ban ym ai laisen shuh nangne shakhmat, namar ba ka Jaitbynriew ka la lah ban trei ia kiwei pat ki kam ba kiwei ki jaitbynriew ki la trei.
Ban pynduna ia ka rukom ai Trading License u EM ka Trade u la ong ba ka tnad kan buh noh da ka jingkhein katno tylli ban ai, bad palat ia kata ka jingkhein yn ym ai iano iano ruh, bad katba nang mih uwei u snem yn pynhiar ia ka rukom ai trading License.