9000 tylli ki Symbai diengjri thung ka KHADC ha Lailad

Shillong, 26 Rymphang:
Ha ka dorbar jong ka KHADC kaba la long mynta ka sngi u MDC ka Sohryngkham-Maw ryngkneng Konstitwensi u bah Pyniaid Syiem u la wanrah ia ka jingkylli hapoh Ing Dorbar haei ka District Council ka la pyndonkam ia ka khlaw ban thung ia ki diengjri, ka jubab ba la ioh na ka EM in Charge jong ka khlaw ka kong Grace Mary Kharpuri ka long ba la thung ha Lailad, Ri-Bhoi.
Utei u MDC u la kylli biang katno la pynlut ban thung ia kitei ki diengjri, ka la jubab ba la pynlut haduh T.16,64,850 tyngka (Khadhynriew lak saw phew hajar phra spah tyngka). U bah Pyniaid u la kylli biang katno tylli ki tynrai dieng jri la thung ha katei ka khlaw, ka kong Grace ka la ong ba la thung 9000 tylli ki tynrai diengjri ha katei ka jaka kaba don 20 hektar.
Katkum ka jubab jong ka kong Grace ka la ong ba la thung ia kitei ki dieng jri naduh u snem 2006 bad la khmih lynti ba kin mih soh noh shen ha kine ki khyndiat sngi. Ka la ong ruh ba ka jingpynlut baroh na ka bynta ban thung ia kitei ki dieng lapynlut hi na ka pla tyngka jong ka District council bad ki ophisar kiba la phah ban peit ia katei ka kam ruh ki dei kiba la dep ban pyntbit.