Nongpoh:Ki Pulit ka Pilangkata Out post, ki la ioh ban bat haduh 9 tylli ki thuk thuk (Bike) kiba dei na ka jylla Assamtuh bad na ki katto katne ki shnong khappud kiba dei na Ri Bhoi, kaba la wan buhrieh da ki nongtuh ha ki ar jaka, kiba don ha ka thain Umtyrnga ha Ri Bhoi.
Ka khana halor ka jingiohbat ki Pulit ia kitei ki Thuk thuk, ka dei hadien ba ki la shimkhia ia ka jingujor na ki paidbah kiba sah ha katei ka thain, ha kaba ki la ujor sha ki Pulit, ba ka la don ka jingjia shah tuh bike kaba na ka por sha ka por ha katei ka thain.
Halor katei ka jingujor da ki riew paidbah, ki Pulit ki la kem shwa ia uwei u briew ba shah suba jur ba u donkti ha katei ka kam tuh thuk thuk bad haba ki la tohkit ia u, utei u briew u la leit ialam sha ka jaka kaba la buhrieh ia kitei ki Bike, kaba kitei ki nongtuh ki la buhrieh ha shnong Umsen bad ka shnong Nagrabil, ki shnong khappud ka Meghalaya-Assam, kiba don ha ka thain Umtyrnga.
Ia ka kyrteng jong utei u suba donkti ha katei ka kam tuh, ki Pulit ki dang buhrieh, namar ki dang kwah ban iohkem shuh shuh ia kiwei pat kiba donkti ha katei ka kam tuh.
Kitei ki Bike kaba la iohkem da ki Pulit ka Pilangkata OP, ki dei na ka jylla Assam bad Ri Bhoi, halor katei ka jingjia ki Pulit kin dang pynlong shuh shuh ia ka jingtohkit khnang ban lap ia ki jingshisha baroh bad khamtam eh halor ka jingpyniaid iew ia kitei ki Bike tuh.
Phi don ban ong eiei?