9 sngi shim wai ka Congress ia ka Helicopter Siew T.27lak sha ka Pawan Hans, na ka elekshon MP?

Shillong 17, Jylliew:
Ka Indian National Congress (INC) ka la shim wai khyndai sngi ia ka Helicopter jong ka kompeni Pawan Hans na ka bynta ban pynlong ia ka jingialap elekshon MP 2014.
Katkum ka jingtip ba la ioh lyngba ka ain wad jingtip paidbah, na ka Meghalaya Transport Corporation (MTC), la pyni ba katei ka party Congress ka la shim wai beit beit na ka Kompeni Pawan Hans na ka bynta ban pyndonkam ia kitei ki khyndai sngi.
Hynrei ka MTC ka la kyntait ba kam tip eiei ia ka dor ka mur ba la ia kut ban siew hapdeng ka Congress bad ka Kompeni M/s Pawan Hans Limited.
Katkum ka RTI ka MTC ka la ong ba kam tip eiei namar ba ia ka Helicopter la sahngeh ban shim wai da ka sorkar Meghalaya. Ka MTC kam tip ruh ia ka por, ka jaka bad ki sngi ba ka shim wai ban leit ialap elekshon.
Ia ka pisa la siew hi da katei ka party sha ka Kompeni Pawan Hans Limited, la bynrap shuh ka MTC.
Lah ban kdew ba ha kane ka elekshon MP u Myntri Rangbah ka jylla u Mukul Sangma u la pyndonkam da ka helicopter Pawan Hans ban ialap elekshon ha ki bynta bapher bapher jong ka Garo Hills na ka bynta u kyrtong ka Congress u Daryl Momin.
Hynrei kane ka jingpyndonkam u Myntri Rangbah kam seisoh namar ba u kyrtong ka Congress u la shah rem ha u kyrtong ka NPP u Purno A Sangma.
Ka bai wai ia ka Pawan Hans, haba la shu khein antad, ka long T.60,000 ha ka shi kynta bad lada jia ba u myntri rangbah,u pyniaid tang san kynta shisngi, kumta kan poi sha ka T.3lak ha ka shisngi bad kumta ha ka 9 sngi, kan poi sha ka T.27lak eiei.