Nongpoh: Ha kaba sdang ia ka 2nd Inter Office Football Tournament 2019, ka lympung ialehkai phutbol kaba la pynlong Nongpoh Sport Association, kaba la pynlong ha Madan NSCA Pahamsyiem, ka 6th Battalion Police ka la ioh ban khur ia ka namjop kaba nyngkong, hadien ba ka la lah ban pynliem noh pyrshah ia ka tnat Fisheries da 9-0.
La sdang ia kane ka lympung ialehkai, da ka jingdon ki nongpyniaid ka NSA kaba kynthup ia u Bah Lambok Rymbai, president ka NSA, ha ryngkat ka jingdonlang bad kiwei de ki riew rangbah bad ki ophisar na kitei ei ki artylli ki tnat sorkar.
Khyndiat haba phai ha ka kylla step jong katei ka jingiakhun, ki rangialehkai na ka 6th Battalion Police, ki la lah ban lamkhmat ia ka jingiakhun da kaba thep haduh 5 kol bad kaba la pynkut ia ka kylla step da 5-0.
Haba bteng ka kylla miet, ki rangialehkai jong ka 6th Battalion ki la nangnoin tyngeh pyrshah ia kitei ki rangialehkai na ka Tnat Fisheries, kumta ha kaba kum katei ka jingiakhun ki la lah ban thep biang sa 4 kol bad kaba la pynlong ia ka kynhun ba kan kan pynliem kput haduh 9-0 bad ban khur ruh ia ka namjop kaba nyngkong, ha kaba sdang jong katei ka lympung ialehkai ka NSA.
Lah ruh ba kdew hangne, ba ha katei ka lympung ialehkai kaba la pynlong da ka NSA, ka long beit thik tang na ka bynta ka tnat sorkar bad ha kane ka lympung ki la don haduh 10 tylli ki kynhun na ki tnat sorkar bapher bapher, kiba la wan ban iashimbynta ha katei ka 2nd Inter Office Football Tournament ka NSA.
Phi don ban ong eiei?