Nongpoh: Ka ophis jong ka Deputy Commisioner jong ka Ri Bhoi, hynnin ka janmiet ka la pynmih ia ka jingpyntip paidbah halor ka jingplie ia ki dukan marbam, kiba don ha kylleng ki jaka ha Ri Bhoi bad katei ka jingailad ia ki paidbah ba kin leit thied leit pet, kan sdang naduh ka por 9 baje haduh 1 baje nohphaisngi.
Halor katei ka jingpynbna paidbah ba la ailad ia ki paidbah ba ki leit siew leit tda, na ka liang ka ophis ka Deputy Commisioner ha Ri Bhoi, ka la buh pat ia ki lad ban the pyrkhing ia ki paidbah bad kata ka long ba haba ki leit ban thied jingthied na ki dukan, kim dei ban shu ia lum lymbung ne khohreh, pynban ki dei ban ia ieng marjngai hapdeng ki riew paidbah, khnang ba kan iada na ka jingsaphriang jong u khing jingpang Corona Virus (COVID-19).
Nalorkata, la kyntu ruh ia ki paidbah ba ki dei ban sngap lane ban iatreilang bad ki bor Pulit bad ruh ba ki paidbah ki dei ban don ia ka Discipline. La kyntu ruh ia ki paidbah ba kin leit thied jingthied na ki dukan ba don marjan ha ki shnong ki thaw bad la ailad ia kito ki paidbah ki bym don dukan ha ki shnong ki thaw ba kin leit ban thied jingthied na kiwei ki dukan kiba don marjan.
Ha kajuh ruh ka por, ki bor Distrik ka Ri Bhoi, ki la pynbna paidbah ba lada don kino kino ki briew kiba kwah ban don ha kajuh ka jaka kata hapoh ka District, la ka long ha ki jaka trei, jaka pule, ki Hostel lem bad kiwei, ki lah ban pyntip lane ban phah ia ki number phun bad ka jaka sah kaba pura, da kaba kin phah sha u whatapps sha u number 9436337807.
Ha kawei pat ka liang, ka ophis ka Deputy Commisioner ha Ri Bhoi, ka la pyntip ruh ba na ka liang ki Bor Distrik ka Ri Bhoi, ki la dep ruh ban buh da ki Magistrate sha baroh ki Block kiba don ha Ri Bhoi, khnang ba kin ioh ban peit ia ka jingeh jong ki paidbah kiba sha ha kito ki shnong kiba don ha kitei ki Block.
U Bah R. Kharbihkhiew un peit ia ka Bhoirymbong C&RD bad uba ki paidbah ki lah ban phun ha u number 7005528368, Ka Kong V.A Hynniewta ha Nongpoh bad kaba ki lah ban phun ha u number 9774876609, ka Kong F.M Lakiang ha DC Nongpoh ha u number 8787363882, u Raja Brahma ha Umsning Block ha u Number 9402191280, u Dr. R. Nongrum ha Umling Block ha u number 8837233681 bad u Bah D. Syiemiong ha Jirang Block ha u number 9862014284.
Phi don ban ong eiei?