8ngut ki MDC, ki dei ban shah mait, dawa ka CSWO na U Lat

Shillong, 20 Naitung:
Ka kong Agnes Khar shiing, President jong ka CSWO, ka la ujor sha U Lat ka Jylla, ha kaba iadei bad ka jingbat ar tylli ki kam, da ki 8ngut ki nong mihkhmat paidbah, da kaba pyni, ba ka Rule 17(1) (a) jong ka Assam (and Meghalaya) Autonomous District (Constitution of District Council Rules 1951, ka khang ia ki nongmihkhmat paid bah, ban bat ar tylli ki kam.
La ong shuh shuh, da ka kong Kharshiing, ba kat kum ki kyndon jong ka article 191(1) (A) jong ka riti synshar Ri, ka la khang, na ka bynta ban bat ia ar tylli ki kam MLA bad MDC bad ka nongia lam jong katei ka seng, ka dawa namarkata ba dei ban pynduh noh ia ka jinglong dkhot jong U Ma Stephan Lamin, uba dei U MLA jong ka Amlarem bad U MDC jong ka War East, nangta U bah HDR Lyngdoh MLA Sohiong bad U MDC jong katei hi ka Constituency, U Bah Ardent Miller Basaiawmoit MLA ka Nongkrem bad MDC jong katei hi kajuh ka Constituency, U bah Metbah Lyngdoh MLA jong ka Mairang bad MDC ruh jong katei hi ka Constituency, U bah Pynshngain Syiem MLA bad MDC ka Mawsynram, Bah Phlastingwell Pangniang MLA bad MDC ka Rambrai Jyrngam, U bah Sanbor Shullai MLA ka South Shillong bad U MDC ka Mawprem bad U Bah Brolding Nongsiej, MLA bad MDC ka Mawthadraishan.
La ong shuh shuh, ba kitei ki MLA/MDC , ki shim ia ka tulop kum u dkhot ka dorbar Jylla bad kumjuh kum u dkhot jong ka District Council ruh lem bad kiwei de ki bai leit bai wan.
La thoh hangtei ba ka Rule 17 (1) ka kren shai ba u dkhot jong ka District Council, un duh noh, ia ka jinglong dkhot jongu, lada u dei uba la ioh tulop na ka sorkar India ne jong ka sorkar Jylla lane lada u dei u nongtrei jong kano kano ka District Council ruh.