8Km ka surok, ba la jan dep, ka la jot rathai harum Pynursla

Shillong:Ka surok, kaba la dei, sa tang ban ai rong, kaba sdang na duh na Mawksing, kaba harum Pynursla bad kaba don kumba 8 Kilometre antad, ha duh ha jaka ieng ki trok ha Madan Lang tad, ka la julor lut khait, na ka daw jong ka jingther jur u slap, ha ki khyndiat sngi ba ladep. Ka jingleh sting jong ka kompeni, kaba trei ia katei ka surok, ha kaba ka la shu iehnoh, khlem trei dep, la shisnem tam, ka la pynleh nohei lut, ia ka jingtrei, kaba ladep lut khoit, naduh kaba pynmadan bad pynheh bad wat ha duh ban da siang ia ki mawsalin, namar ba mynta katei ka surok, ka la dap da ki nala bad ki thliew ki syar, na ka jingrong jong ka um.

Na ka jingtrei ia ka surok, na Um shyrpi haduh ha Tama bil, ka dei tang katei kaba lajan dep pura bad kaba ka kompeni, ka la dei ban airong, hynrei, da ka jingpyn slem, ka la pynjot biang ia katei ka surok bad kaba itieng, ka long, ba katba nangther jur u slap bah, kumta ka tei ka surok, kan sa nang jot rathai shuh shuh.