852ngut ki nongtrei ka koit ka khiah, kiba la shah ktah na ka covid, ong U DHS

Shillong:U Director of Health Services, u Dr Aman War myn hynnin ka sngi ka 2 tarik u Jylliew 2021 u la pyntip ba ki don 852ngut ki nongtrei ka koit ka khiah, kiba la ioh pang covid. Nangta ula iathuh ba naduh u bnai Kyllalyngkot 2020 haduh u bnai Nohprah 2020 ki don kumba 441 ngut ki nongtrei jong ka koit ka khiah kiba la shah ktah ha ka khlam Covid-19 bad 2 ngut pat ki dei kiba la khlad noh bad naduh u bnai Kyllalyngkot 2021 haduh ka 31 tarik jong u bnai Jymmang 2021 pat ki don haduh 411 ngut ki nongtrei jong ka tnad ka koit ka khiah kiba la shah ktah ha kane ka khlam bad kiba la khlad ki don haduh 9 ngut ha kaba napdeng kitei ki 411 ngut ki nongtrei kiba pang, 261 ki la ioh  ia ka jingkoit jingkhiah  bad 141 ngut ki dang don hapdeng kane ka jingpang.

Haba kylli halor ka jingkhlad noh jong kawei ka nos kaba trei hapoh Ganesh Das Hospital hadien ba ka la ioh ia ka jingpang Covid-19, ka Kong Manisha Turnia, u Dr Aman War u la iathuh ba katkum ka jingiathuh napoh ka Ganesh Das Hospital ka long ba ka Kong Manisha ka dei ka nos kaba trei hok bha ha ka kam jong ka, ka long ka bym ju don ktien, kaba trei shitom bha kaba buh shwa ia ki nongpang hakhmat jong kiei kiei baroh. Ka la sdang ia ka kam nos ha u snem 2012 bad ka la ju trei ruh hapoh Mairang Civil Hospital bad ka la shah phah noh sha Ganesh Das Hospital ha u snem 2015. Ka Kong Manisha ka la trei hapoh ka kamra jong kiba ioh Covid-19 mynshem snem hynrei ha u bnai Nohprah ka la pyntip ba ka la armet kumta ka la weng noh ia ka ba kan trei hapoh katei ka kamra bad la phah ia ka ba kan trei beit ha kaba iadei bad kiwei kiwei ki jingshitom bad kaba dei ruh ha ka kamra ki kynthei.