83 tylli ki kam runar ioh bat ka CCTV, ong myntri kam pohiing

Shillong, 17 Nailur:
Ka jingbuh ia ki kor ring dur syntiat ne CCTV ka la iarap shibun ia ka tnad pulit ba kan kem suk ia ki briew ba don kti ha ki kam runar bad katkum ka jingiathuh ka myntri kam pohiing ka
jylla ka Kong Roshan Warjri ki don haduh 83 tylli ki jingjia kiba la ioh bat ban pyndep da ka jingiarap ka CCTV ha kylleng ki jaka ka nong bah Shillong.
Haba jubab ia ka jingkylli ba la wanrah da u MLA ka UDP na Sohra u Bah Titosstar Well Chyne mynta ka sngi hapoh ka dorbar tlang ka iing dorbar thawain, ka kong Roshan ka la ong ba kine ki kam ba la ioh ban kem na ka jingiarap ki CCTV ki dei ki kam iadih ha surok, ka jingiashoh iadat, ka jingniah kali thurmur, ka jingtuh jingthiem, ka jingdih
dendrite bad kiwei de.
“Ngi la ioh ban pyndep haduh 83 tylli ki jingjia lyngba ka jingiarap ka CCTV”, la ong ka Kong Roshan.
Ka la ong ba ia ki kot syntiat la buh ha kylleng ki jaka jong ka nongbah kynthup ha ki 30 tylli ki jaka kum ha Mawlai, Jaiaw, Motphran, Iew Mawlong, Khlieh Iew, Jhalupara, Khyndai Lad, Rilbong, Laitumkhrah, Nongthymmai, Madanrting, Rynjah, Iew Polo bad ha kiwei ki jaka paidbah.
Ka myntri ka la kyntait ba ka la don ka jingshah tuh jong ki CCTV hynrei ka la iathuh ba kaba shah tuh ka dei tang ka bateri kaba don hajan ka ophis ka Stationery.
Ia ki kamera bullet ka thied ha ka dor T. 47, 131 kawei, katba ia ka kamera PTZ la thied ha ka dor T. 87,530 kawei bad la dep pyndait lut ha baroh kine ki 30 tylli ki jaka ha ka nongbah.