8 bnai khlem tulop, trei ki nongtrei ka Jowai Municipal

Jowai, 8 Nailar:
Ki nongtrei jong ka Jowai Municipal Board (JMB) kiba ym shym la ïoh pdiang shuh ïa ka bainong jong ki la palat phra bnai mynta, hynrei kim shym la kyntait pat ban trei ia ka kam na ka bynta ka jingmyntoi jong kiba duk kiba shong ba sah ha sor.
Kum shi  bynta ban pyntreikam iaka Social Mobiliazation and Institutional Development (SM &ID) program kaba hap hapoh ka National Livelihood Mission (NULM) jong ka sorkar India, la pynlong iaka jingpynshai paidbah kaba nyngkong ia kane ka skhim haka ïingskul jong ka Dorbar Shnong Ladthalaboh, Jowai haka janmiet jong ka 5 tarik jong une u bnai.
Haka jingkren jong u ma S.C. Laloo uba long u Chief Executive Officer (CEO) jong ka Jowai Municipal Board ula batai shaphang kane ka mission jong ka NULM bad ia ki hynriew tylli ki bynta (components) jong ka. Kita ki kynthup ia ka Social Mobilization and Institutional Development (SM&ID), ka Employment Through Skills Training and Placement (EST&P), ka Self-Employment Program (SEP), ka Support to Urban Street Vendors (SUSV) bad ka Scheme of Shelter For Urban Homeless (SUH). Ula banjur ba kiba duk kiba shong ba sah ha sor kin ïoh jingmyntoi shikatdei eh lada yn lah ban pyntreikam pura ia ka NULM.
Naka liang u CEO ula pynpaw ruh ka jingsngewnguh ia ka Society for Urban and Rural Empowerment (SURE) ka seng treimon sngewbha (NGO) hapoh ka distrik kaba la kloi ban shimkhia ia kane ka kam. Ula pynshai ruh ba ka SURE kumba long mynta kan shim tang ia kawei ka bynta  jong ka NULM bad kata ka dei ka Social Mobilization and Institutional Development (SM&ID).
Ha kajuh ka por u ma Laloo ula ong ba wat la ka Board mynta ka don haka khim khait, hynrei u sngewkmen pat ba ki nongtrei jong ka, ki shimkhia ban pyndep ia ki kam pynroi sor bad khamtam ia ka NULM kaba lah ban ïarap ia kiba duk bad ki samla ki bym ïoh kam ïoh jam kiba shong ba sah hapoh ka sor Jowai. U ïaroh ïa ki nongtrei jong ka Board kiba la len lade naka bynta ka jingmyntoi jong kiba duk bad ki bym ïohkam ïohjam hapoh ka sor.
Kiwei pat kiba la ai jingkren ha kane ka sngi ki dei u ma L.D. Lakiang Rangbah Shnong ka dorbar shnong Ladthalaboh bad u H.H.Mohrmen uba long u president jong ka SURE. Kane ka long katkum ka khubor ka la phah da u President ka SURE, HH Mohrmen.