8 baje mynstep, haduh 8 baje janmiet, yn plie ki dukan ba ithuh ka sorkar

Shillong:Ka hukum ba la pynmih na ophis treikam ka Deputy Commissioner (DC) ka East Khasi Hills, ka kdew ba ki dukan ba la ithuh da ka sorkar, yn shah ban plie naduh ka por 8 baje mynstep haduh 8 baje myneit hapoh ka nongbah Shillong bad ki jaka markhap lait noh ia ki dukan ba hap hapoh Iewduh bad Khyndailad.

Ka hukum na ophis treikam DC la pynshai ruh ba ki dukan khap shniuh ki dukan Beauty Parlour, ki Cyber Café, Gaming Parlour ki cinema hall bad ki lottery Counter bad ki dukan ba hap hapoh Stand Jeep kim lah ban plie haduh ban da pynbna da kumwei pat. Ka hukum ka pynshai ruh ba ki restaurant ki lah ban plie, hynrei ki dei tang ban rah ia ki jing bam sha ing.
Ka hukum ka batai ruh ba ki dukan ba dei ban plie man ka sngi ki kynthup ia ki dukan sam bad die marbam, ki jaka shna maw block ha ki jaka kham pajih na nongbah Shillong, ki karkhana dewbilat, ki dukan die bad sam marbam bad kumjuh ruh iaki jaka sumar mrad bad ki dukan baroh kiba kham pajih na nongbah Shillong.

Haba dei bad ki dukan ha Khyndailad, ka hukum na ophis treikam DC ka la bthah ba ki dukan kiba don marwei kidei ban plie katkum ki kyndon ba la bthah, kata ha ka jing iaid ryntih katkum ki nomber ba la buh ki bor district kata sngi nyngkong ki dukan 1-3, sngi ba ar 2-4 bad ter ter bad kane kan iaid haduh sngi saitjain.Ki dukan ba don hapoh ki shopping complex lait noh ha Glory Plaza , JM Towers bad ha Jivan Complex kin plie katkum ki nomber 1,2,3 ha ka 8 tarik, 2,4,6 ha ka 9 tarik, 1,3,5 haka 10 tarik, 2,4,6 ha ka 11 tarik, 1,3,5 ha ka 12 tarik bad 2,4,6 ha ka 13 tarik jylliew 2020.Katba ki dukan kiba don hapoh Glory Plaza, JM Towers bad ha Jivan Complex kin plie katkum ki kyndon lane ki nomber kata 1 haduh 6 ba la bthah ki bor sorkar kata ha ka sngi nyngkong ki dukan ba don nomber 1 bad kane kan iaid haduh sngi saitjain.

Ka hukum na ophis treikam ka DC, ka la kdew ruh ba ki dukan dielang, ki dukan die dawai ki dukan die dawai mrad, ki dukan kyiad ki dukan shna bad die kali, ki petrol pump bad ki dukan die marbam ba rah sha ing kin plie man ka sngi.