Ia U bah Anthony Kharbuli, uba dei u nongialam ba rim jong ka Khasi Students Union (KSU), la pynshong haduh hynniew sngi kyn thih ha Sardar Police Station, ba un shah tohkit ha ki pulit bad katei ka dei ka rai jong ka kashari mynta ka Sngi.
Haba iakren bad U Bah Albert Kharbuli, uba dei u para trai jong U Bah Anthony, mynta ka miet, u iathuh ba la pynngat 7sngi ia U bah Anthony, ha ka jingtohkit ki pulit. La iathuh da U bah Albert, ba ki pulit, ki dang kynnoh hi ba U bah Anthony, haduh mynta, u dang dei u dkhot KSU bad ki kynnoh ruh ba ha ka jingialum paidbah ha ka 25tarik Nailur 2013, ha Motphran, U bah Anthony, u mut ban knieh ia ka suloi jong ki pulit bad ki ong ruh ba u dei u dkhot jong ka seng sain pyrthei KHNAM, ong U bah Albert.
U Bah Albert, u iathuh shuh shuh, ba la kem ia U bah Anthony na phyllaw iing jongu, hynnin ka sngi, ha ka por 3.15 na Nongthymmai.
Halor ka jingshah kem jong U bah Kharbuli, la ong da u para jongu “Ngim sngew phylla eiei, namar ym dei bat uh ba thied, u leh na bynta ka jaitbynriew”. U Bah Albert, u iathuh ruh ba haduh ha kine ki sngi, ka mynsiem jingieid ia ka KSU, ka dang iai don beit ha u hynmen jongu.
U Bah Albert, ula kyntait ruh ba u hynmen jongu, u pynmih jingkulmar bad kynshoit ha katei ka jingialum paidbah ha ka 25tarik Nailur ha Motphran. “U shu ong haba iakhih iakhih na ka mynsiem” ong u para, haba iathuh ia ka jingkren jong u hynmen jongu. “Kam don ka jingpynshit” ula ong shuh shuh. La ong biang U bah Albert, ba ha katei ka sngi, ki paidbah, ki mut iaid paidbah na Motphran, namar ba ka dei ka jaka pdeng bad ki ia poi lang hangtei ruh, ba ki mut ban ia leit phai sha la iing, hynrei haba ki pulit ki khang paidbah, ba kin iaid, kumta ka la mih ka jingkhluit na u paidbah.
Kiwei ki lad khubor, ki iathuh ba ka don ka jingthmu ban pynngat ia U bah Anthony ha ki kyndon ain Meghalaya Prevention Detention Ordinance (MPDA) bad lada kan dei kumta, kumba la iakren ha ki bor pulit, kan dei ka sien kaba ar, ba yn pyngngat ia katei ka ain, ia utei u nongialam barim ka KSU bad kham mynshwa ruh U bah Kharbuli, ula shah pynngat ha katei kajuh ka ain, ha u snem 1987, ha kaba ki la shah set lang bad U Bah Bull N Lyngdoh sha Silchar.
Phi don ban ong eiei?